Percillet per ne boten e amshuar H.Faik Hoxha

Më dt. 12.05.2011, u nda nga jeta H. Faik Hoxha, ish myftiu i Zonës Shkodër dhe një prej figurave të shquara të Islamit në Shqipëri. Ai ishte gjithashtu “Qytetar Nderi” i qytetit të Shkodrës, si dhe kishte dekoratën e lartë “Pishtar i Demokracisë” dhënë nga Presidenti i Republikës. Ceremonia e varrimit është zhvilluar ditën e enjte më 12 maj 2011 në qytetin e Shkodrës me pjesëmarrjen e personaliteteve të larta të fesë, pushtetit vendor dhe miq të Haxhi Faikut të ardhur nga të katër anët e Shqipërisë dhe trevat shqiptare.
Ceremonia e xhenazes u zhvillua në xhaminë “Ebu Bekër” në Shkodër. Të pranishëm në këtë ceremoni kanë qenë kryetari i Komunitetit Mysliman të Shqipërisë, Haxhi Selim Muça, nënkryetari i KMSH-së, z. Gazmend Aga, kancelari z. Ali Zaimi, anëtarë të Kryesisë së KMSH-së, kryetari i Këshillit të Përgjithshëm z. Ylli Gurra, myftiu i Zonës Tiranë Hafiz Shaban Saliaj, myftiu i Zonës Berat z. Murat Duro, myftinjtë e Vlorës, Fierit, Lezhës, Malësisë Madhe, etj.
Fjalën e rastit e mbajti Myftiu i Zonës Shkodër Imam Muhamed Sytari që ka theksuar se: “Lajmi i ndarjes tuaj nga jeta i ka kaluar kufijtë e Shkodrës. Në një mesazh ngushëllimi, miqtë tuaj nga Shkupi shkruajnë se: “Haxhi Faik Hoxha do jetë përherë në kujtimet tona një burrë i madh intelektual, një atdhetar i flaktë i çështjes shqiptare, një edukues i shkëlqyer i brezit të ri, një humanist i cili gjatë luftës në Kosovë ishte në ballë të organizimit të ndihmave humanitare dhe në sistemimin e refugjatëve nga Kosova nëpër familjet shkodrane dhe nëpër kampet e ngritura për refugjatë.

Më pas ka ngushëlluar edhe Kryetari i Komunitetit Mysliman të Shqipërisë, H. Selim Muça, që e ka vlerësuar H. Faik Hoxhën si mësues të tijin në medresenë e Tiranës. Ai ka përmendur se roli dhe kontributi i të ndjerit ka qenë i madh në shërbim të mësimeve të fesë islame në Shkodër dhe përtej saj.

Edhe Kryetari i Bashkisë Shkodër, z. Lorenc Luka, ka shprehur ngushëllimet e tij me këtë rast. Ai ka vlerësuar kontributin e madh që H. Faik Hoxha ka dhënë në ruajtjen e harmonisë dhe vlerave qytetare në Shkodër, sidomos në drejtim të Myftinisë.

Namazin e xhenazes e ka drejtuar H. Selim Muça. Ndërkohë në varreza është kënduar sureja “Jasin” nga Hafiz Shukri Kapllan dhe është kënduar telkini nga H. Bashkim Bajraktari, i cili pasoi H. Faik Hoxhën në drejtimin e Myftinisë Shkodër.