Ndron jete Ish-Myftiu i Shkodres H.Faik Hoxha

Sot, dt. 12.05.2011, u nda nga jeta H. Faik Hoxha, ish myftiu i Zonës Shkodër, Myfti Nderi i asaj zone dhe një prej figurave të shquara të Islamit në Shqipëri.

Kush ishte Haxhi Faik Hoxha?

H. Faik Hoxha u lind në Shkodër, më 14.4.1930. Ishte i biri i Sheh Qazim Hoxhës, njëri ndër predikuesit dhe dijetarët më të shquar islamë të atyre viteve.

Mësimet e para i mori në “Shkollën e Kuqe” të Tiranës kurse më pas studioi në “Medresenë e Përgjithshme” në Tiranë, të cilën e përfundoi në vitin 1948 me rezultate të shkëlqyeshme.

Në vitin 1950 emërohet profesor në Medresenë e Përgjithshme në Tiranë ku dha lëndë fetare dhe të përgjithshme. Në këtë detyrë u tregua i aftë, i dashur, u nderua nga nxënësit dhe u vlerësua nga eprorët. Në vitin 1966, kohë kur punonte në Kooperativën e Artizanatit të Shkodrës, u arrestua dhe për 23 vite rresht vuajti dënimin si i burgosur nga regjimi komunist.

Ndryshimet shoqërore të pas viteve ’90 krijuan mundësi të reja për Haxhi Faikun. Ai u angazhua me të gjithë energjitë për rizgjimin e ndjenjave të qytetarëve në besimin te Zoti i madhërishëm dhe për hapjen e xhamive të reja në Shkodër.

Në mbledhjen e parë të përfaqësuesve të rretheve të vendit tonë, në shkurt të vitit 1991, Haxhi Faiku u emërua Myfti i Shkodrës dhe u zgjodh anëtar i Këshillit të Përgjithshëm të Komunitetit Mysliman.

Në të gjitha këto detyra Haxhi Faiku u shqua për një veprimtari të dendur dhe të dobishme për gjallërimin e fesë Islame. Gjatë periudhës kur ishte Myfti Haxhi Faik Hoxha, u ndërtuan 9 xhami në qytet dhe 38 në fshatra, u vunë në funksionim xhamitë që kishin mbetur pa u shkatërruar nga diktatura komuniste, u hap Medreseja “Haxhi Sheh Shamia”, në lagjen Dudas si dhe u ndërtuan dy godina madhështore, në lagjen Perash, dega e Vajzave aty ku ishte shtëpia e “Daut Boriçit”, e ajo e Djemve në truallin e Xhamisë së Haxhi Bajramit. Në Medresenë “Haxhi Sheh Shamia” Haxhi Faiku dha mësimin e besimit duke u bërë kështu një ndër aktivistët kryesorë dhe shembull i përhapjes së Islamit në fëmijët e këtyre shkollave.

Gjatë luftës në Kosovë, me ardhjen e refugjatëve kosovarë, Faik Hoxha ishte në ballë të organizimit të ndihmave dhe të sistemimit të familjeve kosovare në kampet e refugjatëve të ngritura nga shoqatat e ndryshme dhe në familjet shkodrane. Qe pranë tyre që ata njerëz të shpërngulur me dhunë nga trojet e tyre, ta ndienin veten sa më të qetë në strehimet e reja të përkohshme dhe të kishin mundësitë e një jete sa më normale. Në çdo kamp u ngritën në baza vullnetare organizmat për ceremonitë fetare, u caktuan imamët dhe myezinët provizorë dhe filloi jeta e rregullt fetare në kushtet e kampeve të improvizuara në zona të ndryshme të qytetit.

Veprimtaria e Haxhi Faikut është nderuar dhe vlerësuar nga institucionet shtetërore dhe fetare. Mes tyre i është dhënë titulli “Qytetar Nderi” i Shkodrës, i është dhënë dekorata e lartë “Pishtar i Demokracisë” nga Presidenti i Republikës Sali Berisha dhe së fundmi është botuar libri “Faik Hoxha, para pasqyrës së një jete” me autor Myftiun e Shkodrës, thirrësin islam Muhamed Sytari.

Faik Hoxha ishte njeri i veprimit dhe i sakrificës, i cili me entuziazëm dhe me besim të madh tek Zoti, nuk e ndjeu as moshën dhe as peshën e mundimit të viteve e të burgjeve komuniste, por gjithnjë me karakteristikat e një kuadri, kleriku dhe intelektuali të formuar e të talentuar në misionin e Islamit, u tregua shembullor. Njerëz të tillë në fushën e besimit islam dhe të atdhedashurisë, historia i radhit si figurat model cilësish mendore, shpirtërore, humane e qytetare...

Komuniteti Mysliman i Shqipërisë shpreh ngushëllimet më të sinqerta për familjen dhe të afërmit dhe merr pjesë në dhimbjen e tyre. Nga ana tjetër KMSH i drejtohet Zotit me lutje të sinqerta duke shpresuar prej Tij që ta presë Haxhi Faikun me mëshirë, falje e pëlqim dhe t’i dhurojë atij si shpërblim Xhenetin e Amshuar. Amin!*

*Ceremonia e varrimit bëhet sot me dt. 12 maj 2011, ora 18.00 në Shkodër.

Lus Allahun e Madh qe ti jap rahmet.Lus Allahun e Madh qe tia fal gjynahet.
Ju lutemi per shpirtin e H.Faik Hoxhes le te kendoni si staf nga nje fatiha.

Muslimanja shkruajti:Lus Allahun e Madh qe ti jap rahmet.Lus Allahun e Madh qe tia fal gjynahet.
Ju lutemi per shpirtin e H.Faik Hoxhes le te kendoni si staf nga nje fatiha.

Amin!
Muslimanja allahu ta shperblefte me xhennet per kete thirje.
Eshte oblikim qe ti kendoj nga nje fatiha
Myftiut te nderuar!

Lus Allahun e madheruar qe tia fale gjynahet!