Kryesia e KMSH-se dhe myftinjte vizite ne Korce dhe Pogradec

Kryesia e KMSH-së dhe myftinjtë e rretheve kanë zhvilluar në datat 5 dhe 6 Mars 2011 vizita në Medresenë e Korçës, Myftinitë Korçë dhe Pogradec. Delegacioni prej 25 vetash kryesohej nga nënkryetarët e KMSH-së, z. Bujar Spahiu dhe z. Gazmend Aga, sekretari i përgjithshëm z. Ali Zaimi dhe kryetari i Këshillit të Përgjithshëm z. Ylli Gurra.


Delegacioni është pritur nga Myftiu i Zonës Korçë z. Qazim Muçi dhe stafi i myftinisë, të cilët i kanë uruar mirëseardhjen. Miqtë kanë vizituar Medresenë e re të Korçës, e rihapur para dy vitesh. Aty u pritën nga drejtori i shkollës Omer Çallish dhe mësuesit e saj. Pas një pushimi të shkurtër, të shoqëruar nga z. Lauren Luli, Myfti i rrethit Kolonjë dhe njëkohësisht mësues në medrese, ata u njohën nga afër me ambientet e shkollës. Përshtypje të madhe bëri teknologjia e fundit e përdorur në mësimdhënie, klasat dhe laboratorët e lëndëve shkencore, të cilat ishin të pajisura me fjalën e fundit të shkencës.
Më pas delegacioni ka vizituar sallën e konferencave, me një kapacitet prej 300 vendesh. Aty u njohën shkurtimisht, nëpërmjet materialeve filmike, me veprimtarinë e shkollës në këto dy vite, si dhe konsumuan një bisedë të shkurtër me drejtorin e shkollës z. Omer Çallish. Mes të tjerash, ai shprehu falënderimin e veçantë për KMSH dhe drejtuesit e saj në Korçë, ndihma e të cilëve ka qenë e pranishme qysh në hapat e para të ngritjes së kësaj fidanishteje diturie. Duke i njohur nga afër me programin e shkollës, z. Çallish u shpreh se edhe pse kanë kaluar vetë dy vite, arritjet e medresesë janë për t’u vlerësuar. Numri i nxënësve në këtë institucion arsimor është 240, djem dhe vajza, ndërsa pritet që gjatë vitit arsimor në vazhdim ky numër të rritet ndjeshëm. Sipas tij, në këtë institucion arsimor nxënësit nuk marrin vetëm njohuri të përgjithshme, por edhe një formim të mirë fetar. Krahas programit arsimor, për nxënësit organizohen veprimtari me karakter edukues e argëtues. Medreseja e Korçës ka qenë pjesë e shumë projekteve sociale të organizuara në bashkëpunim me Myftininë Korçë dhe institucionet e pushtetit lokal.
Kohët e fundit ky institucion arsimor ka hapur dyert për nxënësit dhe mësuesit e shkollave të tjera të rrethit. Çdo fundjavë në ambientet e saj organizohen kurse të ndryshme. Këto kurse ndiqen nga të paktën 750 persona.
Në emër të Komunitetit Mysliman ka përshëndetur nënkryetari i KMSH-së z. Bujar Spahiu. Duke u fokusuar në arritjet e medresesë, ai përgëzoi përzemërsisht drejtuesit dhe stafin pedagogjik për përkushtimin dhe seriozitetin e treguar në ushtrimin e detyrës së tyre.
Delegacioni ka bërë një vizitë edhe në xhaminë historike të Mirahorit, ku është falur namazi i darkës (jacisë). Kjo vizitë ka pasuar me një darkë të përbashkët. Në cilësinë e mikpritësit Myftiu Qazim Muçi falënderoi drejtuesit myslimanë nga rrethet, duke iu uruar suksese në misionin e tyre në shërbim të Islamit. Mes të tjerash, ai falënderoi në mënyrë të veçantë KMSH-në dhe fondacionin “Sema”, që realizuan këtë vepër madhështore e cila do të shërbejë për edukimin dhe arsimimin e filizave të rinj të Islamit, jo vetëm në Korçë por edhe në të gjithë Shqipërinë, madje edhe jashtë saj. Tepër i mallëngjyer ai nënvizoi se çdo myfti do të ishte krenar për këtë institucion gjigant. Ndërtimin e këtij kompleksi z. Muçi do ta quante si një pranverë të dytë për jetën e Islamit dhe myslimanëve të rrethit të Korçës.
Në ditën e dytë të vizitës, delegacioni ka vizituar edhe ambientet e xhamisë së re pranë medresesë, një investim gjigand, pjesë e këtij kompleksi. Me një infrastukturë të gërshetuar mes klasikes dhe modernes, xhamia të tërheq e të bën për vete. Me një kapacitet për më shumë se 700 vetë ajo pasuron kompleksin e godinave të medresesë duke i dhënë edhe lagjes një shkëlqim rrezatues.
Delegacioni u largua jo vetëm me përshtypjet më të mira për Medresenë e re të Korçës, por edhe me kënaqësinë në zemër se tradita e medreseve vazhdon... ajo farë e hedhur nga të parët tanë tashmë po forcohet me farëra të reja që do ta bëjnë më të dëgjueshëm zërin e Islamit këtyre anëve.
Në vijim të turit të vizitës delegacioni u ndal edhe në Pogradec, ku janë vizituar ambientet e qendrës Islame, xhamia dhe zyrat e myftinisë. Vizitorët janë pritur nga Myftiu i rrethit z. Namik Mahmutllari, i cili ka shprehur kënaqësinë për këtë vizitë të rrallë në Myftininë Pogradec.
Gjatë rrugës delegacioni vizitoi xhaminë historike të Nazareshës, ku pjesëmarrësit falën namazin e drekës dhe u pritën nga myftiu i rrethit z. Agim Duka.Kjo vizitë pune ishte një shkëmbim përvoje dhe eksperience midis drejtuesve të myftinive dhe kryesisë së KMSH-së. Si përvojë e re ajo do të pasohet edhe me vizita të tjera brenda dhe jashtë Shqipërisë.