Ambasadori i Palestinës vizitë në KMSH

Kryetari i Komunitetit Mysliman, Haxhi Selim Muça, priti sot në zyrën e tij ambasadorin e Palestinës në Tiranë, z. Issam Massalha.

Pasi i uroi përzemërsisht mirëseardhjen, Kryetari Muça e njohu diplomatin palestinez me historikun e KMSH dhe përpjekjet e tij të vazhdueshme për ta bërë Islamin edhe më të pranishëm tek shqiptarët dhe shërbimin që institucioni ofron ndaj besimtarëve dhe shoqërisë nëpërmjet veprimtarive të shumta e të larmishme fetare, sociale e kulturore. Gjithashtu z. Muça e njohu z. Massalha me punën e mirë që medresetë dhe universiteti BEDER, bëjnë për edukimin dhe arsimimin e brezit të ri, me synimin që në një të ardhme të afërt ata të kthehen në faktorë të ndryshimit dhe zhvillimit të shoqërisë shqiptare.

Nga ana e tij ambasadori Issam Massatha e falënderoi përzemërsisht për pritjen e ngrohtë dhe miqësore dhe i përcolli kreut të KMSH-së përshëndetjet më të përzemërta të presidentit palestinez Mahmoud Abbas. Më tej z. Massalha, vlerësoi punën dhe veprimtarinë e KMSH-së në këto dy dekada në shërbim të besimtarëve. Ai gjithashtu vlerësoi pozitivisht përkrahjen që Shqipëria i ka dhënë Palestinës si dhe për solidaritetin e vazhdueshëm të myslimanëve shqiptarë në ndihmë të popullit palestinez, duke shprehur bindjen se kjo ndjeshmëri e shqiptarëve për të drejtat dhe liritë e palestinezëve do të ndikojë në rritjen e miqësisë dhe respektit të ndërsjellë.

Ndërsa Kryetari Muça, duke vlerësuar marrëdhëniet e mira mes dy popujve, tha se lutet e shpreson në arritjen e një zgjidhjeje të shpejtë të çështjes palestineze, çfarë sipas tij “do të shërbejë si faktor kyç për të rikthyer paqen, stabilitetin dhe sigurinë jo vetëm në Palestinë, por në tërë rajonin”.

Ambasadori Massalha e ftoi Kryetarin Muça për të vizituar Palestinën dhe Jeruzalemin (Xhaminë Aksa), nisur nga përcaktimet profetike, duke e konsideruar këtë vizitë si mbështetje të së drejtës të popullit palestinez, ftesë të cilën z. Muça e priti dhe e pranoi me kënaqësi.

/Drita Islame/