Nesër myslimanët festojnë Fitër Bajramin

Mbarë myslimanët në të gjithë botën nesër do të festojnë Fitër Bajramin.
Festa e Fitër Bajramit është nesër (e dielë). Ceremonia zyrtare e kësaj dite do të zhvillohet në bulevardin “Dëshmorët e Kombit”, në segmentin para ish Hotel Dajtit. Namazi i Bajramit falet në orën 06:34.
Fitër Bajrami shëmbëllen me një ditë paqeje, ku besimtari vendos paqen në zemrën e tij, i mbështetur në ligjet e Zotit dhe duke përjetuar një jetë të devotshme. Bajrami është ditë e madhe ku manifestohet mëshira, falja, bujaria, humanizmi dhe përkujtimi i dashurisë ndërmjet njerëzve. Në këtë ditë, besimtarët myslimanë festojnë dhe gëzojnë arritjet e tyre gjatë Ramazanit në shërbim të Zotit.
Fitër Bajrami është triumf i individit dhe vetëkontrollit të tij ndaj tundimeve të së keqes, është ditë e harmonisë, respektit dhe vëllazërimit ndaj njëri-tjetrit. Është ditë lutjesh e falënderimi për mundësitë që Zoti i dha agjëruesit për ta kurorëzuar me sukses këtë detyrë të shenjtë.
Festa e këtij Bajrami paraqet dashuri, lumturi, harmoni e bashkim në çdo aspekt të jetës. Në këtë ditë gërshetohet gëzimi dhe harmonia që duhet të hyjnë në çdo zemër e shtëpi.
/Drita Islame/