U PROMOVUA NË ANKARA LIBRI “TERRORI I SERBISË PUSHTUESE MBI SHQIPTARËT 1844-1999”

Aktiviteti për prezantimin në Ankara të librit të autorit nga Kosova Prof.Dr. Nusret Pllana me titull “Terrori i Serbisë Pushtuese Mbi Shqiptarët 1844-1999” u realizua në datën 6 qershor 2012 në orën 17:00 në Qendrën Kulturore të Kuvendit të Madh Popullor Turk “Mustafa Necati”.

Promovimi i librit u organizua nga Lidhja e Shkrimtarëve të Turqisë me kontributin e Ambasadës së Republikës së Kosovës në Ankara.

Aktiviteti u drejtua nga zv/kryetari i Lidhjes së Shkrimtarëve të Turqisë, Ahmet Fidan. Në këtë aktivitet të rëndësishëm morën pjesë bashkëshorti i Presidentes së Republikës së Kosovës Atifete Jahjaga, Ambasadori i Republikës së Kosovës në Ankara, Bekim Sejdiu, Anëtari i Kryesisë së Kuvendit të Madh Popullor Turk dhe Deputeti i Partisë AK për provincën e Konjës Mustafa Kabakxhi (Mustafa Kabakcı), Deputeti i Partisë AK për provincën Kocaeli Muzaffer Bashtopçu, zv/kryetari i Partisë së Bashkimit të Madh të Turqisë (TBBP) Ahmet Gyrhan (Ahmet Gürhan) Kryetari i Lidhjes së Shkrimtarëve të Turqisë Ibrahim Ulvi Javuz (İbrahim Ulvi Yavuz) dhe Sekretari i Përgjithshëm i Lidhjes së Shkrimtarëve të Turqisë për Çështjet Financaire Erbaj Kuxhet (Erbay Kücet), ish-deputetë, akademikë, përfaqësues të shoqatave të ndryshme shqiptare në Turqi, përfaqësues të shoqërisë civile dhe studentë që vazhdojnë studimet e larta në Ankara.

Fjalën e hapjes se mbajti Kryetari i Bordit Drejtues të Mirëbesimit të Fondacionit të Lidhjes së Shkrimtarëve të Tuqrisë, D.Mehmet Doan (Mhemet Doğan), i cili tha se viti 2012 përkon me 100-vjetorin e luftërave të Ballkanit. “Ngjarjet që kanë ndodhur 10 vite më parë në Kosovë janë zhvilluar edhe 100 vite më parë. Shteti i Kosovës doli pas këtyre masakrave të mëdha. Por kjo ngjarje e madhe natyrisht që ka një sfond serioz historik”, tha ai.

D. Mehmet Doan theksoi se Kosova është njëkohësisht edhe atdheu i autorit të himnit të Turqisë, Mehmet Aki Ersoj.

Doan tha se masakrat në Kosovë janë bërë për të siguruar ekuilibrin me popullsinë myslimane që ka qenë më e madhe në numër. Sot në Turqi jetojnë më shumë shqiptarë se e gjithë popullsia e Kosovës. Ne e duam Kosovën. Kemi lidhje dhe marrëdhënie shumë të mira me popullin e Kosovës. Turqia me të 75 milionë banorët e saj është motër e Kosovës dhe do të jetë kurdoherë pranë saj”, shtoi ai.

Pas zotit D. Mehmet Doan e mori fjalën Ambasadori i Republikës së Kosovës, z.Bekim Sejdiu, i cili e falënderoi Shoqatën e Shkrimtarëve të Turqisë për organizimin e këtij aktiviteti. “E përgëzoj Zotin Nusret Plalna për këtë punë të madhe që ka bërë. Shumica e fotografive që gjenden në libër janë tronditëse dhe të rënda. Ato i takojnë periudhës kur Kosova fitoi pavarësinë e saj. Ambasadori Sejdiu tha se libri në fakt përcjell një mesazh shumë të thjeshtë por edhe të fuqishëm. “Komunitetet dhe elitat politike e intelektuale në Ballkan duhet të bashkëpunojnë për të mos lejuar përsëritjen më të këtyre pamjeve dhe dhimbjeve. E kaluara jonë është e vështirë, është një kaluar që nuk harrohet lehtë. Ne si popull i Kosovës jemi të vendosur për të mos mbetur peng i të kaluarës. Ne jemi të përkushtuar për të punuar në drejtim të vazhdimit të paqes dhe stabilitetit në Ballkan. Ky libër i zotit Nusret Pllana na ndihmon ne, popullin e Kosovës, të kuptojmë më drejtë të kaluarën tonë, por ndihmon gjithashtu edhe popujt e tjerë të botës për të kuptuar atë çfarë ka ndodhur me ne në të kaluarën”, u shpreh Ambasadori i Republikës së Kosovës në Ankara, Zoti Bekim Sejdiu.

Ambasadori i Kosovës me këtë rast e falënderoi Turqinë dhe popullin turk për mbështetjen dhe përkrahjen e vazhduesve që ka dhënë dhe vazhdon ti japë Kosovës në shumë fusha, duke nënvizuar se e ndjejnë veten me shans që kanë pranë në rajon një aleate të fuqishme si Turqia, një nga vendet e para që e ka njohur pavarësinë e shtetit të Kosovës.

Kurse anëtari i Kryesisë së Kuvendit të Madh Popullor Turk dhe Deputeti i Partisë AK për provincën e Konjës Mustafa Kabakxhi (Mustafa Kabakcı) në fjalën e tij tha se dëshira e tij ishte që të fliste në këtë aktivitet për ngjarje e zhvillime më të bukura, por vijoi duke cituar thënie të filozofit të misticizmit turk, Mevlana Xhelaledin Rumiu, i cili thotë “Me njëri-tjetrin kuptohen jo ata që flasin me të njëjtën gjuhë, por ata që ndajnë të njëjta gjëra”, duke u munduar të shprehë dashurinë e madhe që ushqehen për Kosovën dhe popullin e saj, pavarësisht se nuk flet të njëjtën gjuhë.

Pastaj e mori fjalën autori i librit “Terroi i Serbisë Pushtuese Mbi Shqiptarët 1844-1999”, Prof. Dr. Nusret Pllana. Ai tha se në libër nuk janë përmendur emra politikanësh, liderësh, qeverish. Njerëzit që ndodhen në rreth 500 fotografitë që përmban libri nuk janë njerëz të thjeshtë të pafajshëm që janë përballur me dhunë, tortura, plagosje, presion. Duke i parë më nga afër këto fotografi, - vijoi ai, mund të dallohet qartë urrejtja patologjike që është ushqyer kundër shqiptarëve, se janë trashëguar këto ndjenja sadiste nga njëri brez në tjetrin. Gjatë shfletimit të faqeve të librit do të shikoni fatkeqësisht shqiptarë të rrahur, keqtrajtuar, të torturuar dhe vrarë para familjes, gra dhe femra të përdhunuara, njerëz me kokë të prerë, të djegur të gjallë e shumë pamje të tjera rrëqethëse, të cilat e përlotin njeriun kur i shikon. Ky libër përmban një faktografi mbi krimet serbe të kryera në Kosovë për më shumë se një shekull”, sqaroi Profesor Pllana.

Në këtë promovim u evidentuan përpjekjet dhe sakrificat e mëdha të shqiptarëve të Kosovës për liri e pavarësi gjatë periudhës 100-vjeçare, nga shpallja e pavarësisë së Shqipërisë deri në shpalljen e pavarësisë së Kosovës.

Ceremonia e promovimit të librit të Prof.Dr.Nusret Pllana me titull “Terrori i Serbisë Pushtuese Mbi Shqiptarët 1844-1999” përfundoi me shfaqjen e një dokumentari dhe ekspozite me fotografi të masakrave serbe gjatë luftës së fundit në Kosovë.

Librin e ka redaktuar Prof.dr. Emin Kabashi ndersa redaksia perbehet nga Adem Demaçi, Agim Çeku,Emin Kabashi, Halit Halimi, Sabit Uka, Gazmend Berisha, Jusuf Osmani. /trt/