Punëtorët e vjetër më produktiv në punë se kolegët e tyre të rinj

LONDER- Stafet e vjetra në punë janë më produktive se sa kolegët e tyre të rinj, sipas një hulumtimi të publikuar në Daily Mail

Personeli më i vjetër i një stafi mund të shfaqë shenja dobësie dhe mungesë shkathtësie në punë por ata i kompensojnë këto me përvojën e tyre më të madhe, me aftësinë që kanë për të punuar në ekipe si dhe me mënyrën se si përballen me punët që shkojnë keq.

Hulumtuesit shprehen: “Edhe pse punëtorët më të vjetër mund të bëjnë më shumë gabime, kjo për shkak të atributeve fizike në rënie, përsëri përvoja që kanë nuk i lejon të bëjnë gabime të rënda”.

“Përvoja i parandalon gabimet e rënda”.

Shkencëtarët që kanë studiuar linjat e prodhimit në një fabrikë të Mercedes Benc në Gjermaninë Jugore kanë arritur në konkluzion se të rinjtë në punë, edhe pse të kualifikuar dhe me arsim të lartë janë më pak produktive në punë se ata me më pak kualifikime dhe me përvojë më të gjatë.

Kërkuesit e Universitetit të Mannheim-it deklaruan se gjetjet e tyre kanë hedhur poshtë idenë se me kalimin e viteve punëtorëve të vjetër i bie produktiviteti.

“Nëse do të ishte e vërtetë që të vjetrit kanë më pak produktivitet, atëherë në shumë vende të zhvilluara do binte produktiviteti po të shihej mosha mesatare e popullsisë gjithmonë e më e vjetër”,- thonë shkencëtarët.

Sipas hulumtimit do të ishte mirë që përvoja e grave të vjetra (të cilat bëjnë më pak gabime) në punë të bashkohej me atë të djemve të rinj të cilët përgjithësisht janë të hutuar. Kjo do ti shërbente punës në ekip.
(m.a/BalkanWeb)