Një shqiptare mes shoqërueseve të Gedafit: S’është siç duket

Rea Beko, nga shkurti 2009, ka marrë pjesë në të gjithë takimet me Ghedafin, i cili e ka ftuar edhe në Libi .
Ndoshta e mbani mend. Dy vjet më parë u punësuan për të qenë publiku i kënaqshëm në sytë e kolonel Gedafit. Ishin gati 500 vajza, teksa me kalimin e kohës shumë mundën të gjenin punë të ndryshme, të tjera mbetën me mbresa nga diktatori libian dhe nuk e kanë braktisur kurrë atë. Dhe tani që ka ardhur momenti për t’u shkëputur, duket se nuk kanë ndërmend të tërhiqen. “Ndoshta, Gedafi ka edhe fajet e tij, metoda të ndryshme nga tonat, por nuk është një tiran siç po e përshkruajnë. Mendon vetëm për interesat e vendit të tij”, vëren Rea Beko, shqiptarja 28-vjeçare. Në këto 24 muaj ka bërë disa udhëtime në Libi, është konvertuar në Islam dhe nuk është e vetmja që vazhdon të mbështesë diktatorin në momentin e nevojës. “Kemi vizituar thuajse të gjithë Libinë, të ftuara nga Gedafi – tregon bashkë me tre italiane, Miriam, Francesca dhe Valentina -. Të gjithë në stafin e tij na trajtuan si mbretëresha, si motra, me respektin për feminilitetin tonë të pamasë”. Rea, nga shkurti 2009, ka marrë pjesë në të gjithë takimet me Ghedafin. Herën e parë, mes 250 vajzave të pranishme ishte e vetmja që ngriti dorën kur koloneli pyeti se kush kishte lexuar Kuranin. “Nga ai moment, ai u interesua menjëherë për mua dhe kur ftoi të gjitha për të vizituar Libinë, përfitova nga rasti fluturimthi. Pas dy javësh u nisëm plot 12 vetë: unë, një vajzë me origjinë libiane, një që po bënte një temë diplome mbi të, një që studionte arabisht dhe të tjera. Fillimisht ishim pak të frikësuara – pohon – sepse nuk e njihnim vendin, kulturën, dikush trembej edhe se mund të na bënte keq, por në fund u larguam me lot në sy. Të gjithë u treguan vërtetë shumë mikpritës”. Libia që pëshkruan Rea është një vend i qetë, qindra vite dritë larg nga revoltat që e kanë ndezur brenda dy viteve. “Populli e donte udhëheqësin e tij dhe ishte krenar që kishin cilësi jete më të lartë se fqinjët e tjerë afrikanë. Ndoshta Gedafi do të ketë fajet e tij, metodat e tij të ndryshme nga tonat, por ishte i vetmi që i dha Libisë një identitet. Mendoj se ndërhyrja ushtarake që po ndërmerret nuk është një mision paqeje, por një luftë për naftën”. Ndërkaq, ditën e shtunë, më 26 mars, në Romë është në program një manifestim në favor të liderit libian Gedafi, i organizuar nga Hostesssëeb. Është kjo agjencia on line e modeleve që ka planifikuar takimet e tij në Romë në shkurt të vitit 2009 me një grup prej 500 vajzash. Në një komunikate agjencia bën të ditur se “gjatë dy vjetësh kemi qenë në Libi dhjetëra herë, rreth njëqind të rinj, vajza dhe djem, në çadrat e tij (Gedafi). Kemi ngrënë bashkë hurma Arabie e kemi pirë qumësht deveje, kemi diskutuar për marrëdhëniet mes dy vendeve dhe se cila është konsiderata që të rinjtë italianë kanë për Libinë, kemi folur për politikë, fe, për të ardhmen e punës, për sportin, për gjithçka… Ai ka dëshmuar shumë interes për mendimet tona dhe ka thënë që është mik yni..”
Nga: iku.al