Feja në shkollat e Kosoves

Drejtuesit e Bashkësisë Islame të Kosovës, kanë shtuar edhe një herë nevojën e futjes së lëndëve fetare në shkollat fillore e të mesme publike të vendit, pasi në këtë mënyrë sipas tyre do të plotësoheshin edhe të drejtat e njeriut, mirëpo jo të gjitha konfesionet fetare në Kosovë janë pro futjes së edukimit fetar në shkolla.

Këto vlerësime janë nxjerrë gjatë një konference të organizuar nga BIK me temën “Mësimet mbi fenë në institucionet publike të arsimit: përvojat nga rajoni dhe modalitetet e përshtatshme për Kosovën”.

Në këtë rast Myftiu i Kosovës, Naim Tërnava tha se shoqëria në Kosovë ka nevojë për edukim fetar, i cili bëhet në shkollat publike dhe sipas një plan-programi të konsoliduar dhe ku punohet dhe veprohet me kuadro të përgatitur në këtë fushë.

“Me aplikimin e mësimit për fenë e sistemit publik arrihet që shmanget mësimi informal për fenë dhe arrihet që rinia jonë të ruhet nga ndikimet e ndryshme që nuk kanë të bëjnë me realitetin dhe traditën në të kaluarën tonë. Përmes kësaj forme të mësimit për fenë arrihet që të ruhet doktrina hanefite në jurispodencën islame, mbi të cilën është zhvilluar këtu e 600 vjet feja islame në këto troje, e që njihet për tolerancë e mirëkuptim si dhe për interpretim racional të mësimeve për fenë islame”, ka thënë Tërnava.

Sipas tij, futja e edukimit fetar në shkolla vetëm se do të sjellë të mira për shoqërinë dhe bëhet plotësimi i të drejtave njerëzore sikurse gati në të gjitha vendet evropiane dhe ato fqinje.

Nga ana tjetër profesori amerikan, Stephen Batalden ka mbajtur një ligjëratë me temën “Religjioni dhe arsimi publik në Shtetet e Bashkuara: modelet kundërthënëse për mësimin e religjionit në sferën publike”.

Ai tha se në SHBA, nuk aplikohet mësimi mbi fenë në shkollat publike, por financohen projekte të ndryshme që mundësojnë mësimin dhe edukimin fetar.

“Liria fetare është një nga të drejtat themelore të natyrshme të akorduar për qytetarët e Shteteve të Bashkuara për të mbrojtur këtë të drejtë themelore dhe individuale. Kongresi nuk mund, pra e ka të ndaluar që të aprovon ndonjë ligj që të krijonte autoritetin e shtetit mbi praktikat fetare që do të mundësonte shtetin të privilegjoj një fe të veçantë si në rastin e shteteve evropiane në shekullin e XVIII”, ka thënë Badalten.

Por derisa Bashkësia Islame kërkon futjen e edukatës fetare në shkolla, jo të gjitha konfesionet fetare në Kosovë janë pro kësaj ideje. Fehmi Cakolli nga Kisha Protestante e Kosovës tha se ka forma tjera me të cilat do të mund të mësonin nxënësit mbi fenë.

“Ne mendojmë që feja në shkolla nuk do të duhej të futej, sepse mendojmë që ky është një përcaktim i rendit shoqëror demokratik, por edhe vetë rrethanave historike të popullit tonë. Andaj mund të gjendën forma tjera qofshin nga vet BIK në bashkëpunim me MASHT-in dhe në bashkëpunim me bashkësitë tjera fetare”, ka thënë Cakolli.

Konferenca lidhur me fenë në institucionet e arsimit publik i zhvillon punimet edhe gjatë ditës së nesërme.(Kosovapress)