BE-ja i bën thirrje Maqedonisë për vetëpërmbajtje

Shefja e diplomacisë evropiane, Federika Mogherini dhe komisioneri evropian për Zgjerimin, Johanes Han përmes një njoftimi të përbashkët për shtyp shprehën shqetësim dhe dënuan ashpër ngjarjet në Kuvendin e Maqedonisë.“Dënojmë ashpër sulmet që ndodhën të enjten ndaj deputetëve të Parlamentit në Shkup. Aktet e dhunës në Parlament janë tërësisht të papranueshme dhe ne bëjmë thirrje për qetësi dhe vetëpërmbajtje”, deklaruan Mogherini dhe Han në komunikatën e përbashkët.

“Ministria e Punëve të Brendshme dhe policia duhet që të garantojnë sigurinë e Kuvendit dhe anëtarëve të tij”, shtuan dy krerët.

“E shohim me pozitivitet zgjedhjen e Talat Xhaferit si kryetar të Kuvendit. Bashkimi Evropian është i bindur se dialogu politik në institucione është mënyra e vetme për avancimin dhe kërkojmë që të gjitha partitë politike ta respektojnë Kushtetutën e vendit dhe të veprojnë në frymën e parimeve demokratike, dinjitetit dhe maturisë”, vijon komunikata./trt/