Zjarri në spital: Pacientët u zunë për çështje pronash?

Ngjarja e rëndë ndodhi në repartin e Hemodializës në Spitalin Amerikan 1 në Tiranë. Pacienti 57-vjeçar Lefter Canaj, pas një debati, spërkati me benzinë pacientin tjetër Dashamir Saraçi dhe i vuri zjarrin. Flakët dhe tymi i marrin jetën dy pacienteve 55-vjeçare, Sanije Sulaj dhe Hanife Mali. Sipas gazetës Panorama, të dy janë grindur për një konflikt të hershëm pronësie. Të tjera media thonë se sherri mes tyre kishte nisur për një debat politik

Dy të vdekur dhe 20 të plagosur, dy prej të cilëve në gjendje kritike për jetën.

Ky është bilanci i ngjarjes së rëndë të ndodhur në vendin ku nuk pritej, pikërisht në ambientet e brendshme të Spitalit Amerikan në Tiranë.

Burime zyrtare të policisë së Tiranës bëjnë të ditur se pas një konflikti, pacienti Lefter Canaj ka spërkatur me benzinë pacientin tjetër Dashamir Saraçi dhe i ka vënë zjarrin.

Për shkak të flakëve të dendura dhe asfiksisë nga tymi i përhapur shpejt fatkeqësisht dy paciente Hanife Mali dhe Sanije Sulaj që të dyja 55-vjeçare kanë humbur jetën në mënyrë të menjëhershme.

Ndërkohë të plagosur rëndë kanë mbetur edhe autori i dyshuar Canaj dhe Saraçi, të cilët ndodhen nën trajtimin mjekësor.

Ngjarja e pazakontë dhe shumë e rëndë ndodhi rreth orës 11:00 në pavijonin e Hemodializës së Spitalit Amerikan 1.

Menjëherë pas shpërthimit të zjarrit stafi mjekësor dhe familjarë të pacientëve kanë ndërhyrë për të shpëtuar sa më shumë të shtruar që ndodheshin në këtë pavijon për trajtim të hemodializës.

Mësohet se kanë qenë rreth 26 pacientë të shtruar, por fatmirësisht kanë shpëtuar.

Mes të plagosurve për shkak të djegieve janë edhe pjesë e stafit mjekësor një infermiere dhe një mjeke.

“Autori i zjarrvënies Lefter Canaj pasi ka mbaruar dializën ka shkuar në dhomën e pacientit Saraçi, ka nxjerrë nga qesja një bidon dhe dyshohet të ketë spërkatur me benzinë atë dhe më pas i ka vënë zjarrin. Me ndërhyrjen e infermierëve është bërë e mundur shuarja e zjarrit mbi autorin e dyshuar dhe të dëmtuarin” -thuhet në njoftimin e policisë.

Në vendin e ngjarjes mbërritën edhe forcat zjarrfikëse dhe sipas tyre nga veprimet e para dyshohet se zjarri është i qëllimshëm dhe për përhapjen e flakëve u përdor një shishe benzinë.

Për shkak të materialeve spitalore lehtësisht të djegshme, flakët janë përhapur në mënyrë të shpejtë dhe ky ka qenë shkaku që nuk është bërë i mundur shpëtimi i jetëve të dy 55-vjeçareve nga Mamurrasi dhe Laçi, të cilët ishin nën trajtim me shërbimin e hemodializës.

Në vendin e ngjarjes konstatohen lehtë dëmet e shumta materiale të shkaktuara, ndërsa për disa orë paniku ka përfshirë jo vetëm stafin mjekësor, por edhe pacientë dhe të afërm të tyre.

Pas ngjarjes së rëndë mbërriti edhe ministri i Shëndetësisë, Ilir Beqja, i cili u shpreh se po merren të gjitha masat që të mos ndërpritet shërbimi i hemodializës, pavarësisht ngjarjes me përmasa tragjike.

Familjarët e dy viktimave ishin mjaft të tronditur dhe pasi kanë kryer procedurat e nevojshme ligjore pritet që të tërheqin trupat e pajetë për të kryer më pas ceremoninë mortore.

Nga ana tjetër, ekspertët janë përqendruar në zbardhjen e plotë të rrethanave të ngjarjes, ndonëse provat janë të shumta që tregojnë se shkaktar i këtij krimi është 57-vjeçari Lefter Canaj.

Sipas dëshmitarëve ai ishte pacient i hemodializës dhe paraqitej dy herë në javë për të marrë këtë shërbim.

Ata tregojnë se ishte person i mbyllur në vetvete dhe nuk përfshihej në diskutime, por nuk kishte shfaqur shenja të dukshme depresioni.

Ndërsa mjekët shpjegojnë se pacientët që marrin shërbimin e hemodializës shpesh kalojnë momente depresioni, pasi sëmundja e rëndë e nxit çekuilibrimin.

Pasojat mund të ishin shumë më të rënda nëse nuk do të ishte ndërhyrja e shpejtë e stafit të spitalit dhe të afërmve të pacientëve.

Për shkak të vendosjes së aparaturave pacientët e kanë të pamundur që të lëvizin në mënyrë të menjëhershme, pasi kjo do iu shkaktonte pasoja serioze, deri në humbjen e jetës për shkak të hemorragjisë.

Për këtë arsye u desh ndërhyrja e stafit mjekësor dhe familjarëve që mes zjarrit, tymit të dendur dhe panikut të nxirrnin pacientët nga aparaturat dhe më pas t’i vendosnin në një vend me të sigurt.

Spitali Amerikan: Nuk mundet ta parandalonim, stafi reagoi shpejt

Pak orë pas rënies së zjarrit dhe humbjes së jetës së dy pacientëve ka reaguar edhe Spitali Amerikan 1 në Tiranë.

Sipas tyre ngjarja nuk mund të parandalohej dhe nga verifikimi që kanë kryer nuk është përgjegjësia e tyre për atë që ka ndodhur.

“Ngjarje të tilla janë të paparashikueshme, nuk mund të parandalohen, pasi pacientët kanë sendet e tyre vetjake, ne nuk mund të shkelim të drejtat për t’i kontrolluar, bidoni i pacientit supozohej që të ishte me ujë” – deklaroi mjekja e Spitalit Amerikan.

Në lidhje me reagimin, pasi ndodhi shpërthimi i flakëve mjekja shpjegoi se reagimi ka qenë i menjëhershëm nga ana e personelit dhe kur ka ardhur policia me zjarrfikësen gjithçka ka qenë nën kontroll.

“Ajo që ka ndodhur ka qenë një ngjarje shumë e rëndë që duhet ta kuptoni. Salla ka qenë në ngarkesë të plotë me 30 pacientë që ishin duke kryer seancën e dializës dhe e kanë të pamundur të lëvizin, pasi është i lidhur me makinën”.

Sipas shpjegimeve të mjekëve, një pacient hyri dhe kreu një veprim për të cilin do të prononcohet policia për të mos dhënë detaje të mëtejshme.

Pacienti ka hyrë dhe ka kryer veprimin, ka shpërthyer flaka, infermieri është djegur në tentativë për të shpëtuar pacientin.

“I gjithë stafi është dëmtuar në tentativë për të shpëtuar pacientët. Brenda 3 minutave stafi nxori jashtë pacientët dhe ndërhyrja ishte e menjëhershme. Kur erdhi policia dhe zjarrfikësja gjithçka ishte në kontroll. Të gjithë pacientët janë jashtë rrezikut, përveç dy pacienteve që kanë qenë në sallën e vogël në afërsi më pacientin e dëmtuar kur ndodhi ngjarja” -thuhet në komunikimin zyrtar.

Ndërsa në lidhje me shkaktarin e ngjarjes, pacientin Lefter Canaj, mësohet se gjendja shëndetësore e tij është tepër e rëndë dhe mësohet se ai është djegur në 90 për qind të trupit.

Urdhër-arresti për autorin, vendosen dy akuza të rënda

Pasi grumbulloi provat në vendin e ngjarjes dhe siguroi dëshmitë e duhura, policia, në bashkëpunim edhe me Prokurorinë e Tiranës lëshuan urdhër-arrestin për 57-vjeçarin Lefter Canaj.

Ndonëse gjendja e tij shëndetësore mbetet kritike në pavijonin ku ndodhet i shtruar ndodhen efektivë të policisë, të cilët e mbajnë nën arrest.

Cani akuzohet për dy vepra penale, atë të zjarrvënies së qëllimshme dhe vrasje në rrethana cilësuese.

Për të kompletuar më shumë dosjen policia ka marrë edhe dëshmitë e disa pacientëve të cilët e njihnin dhe gjithashtu edhe stafin mjekësor.

Ata kanë treguar se nuk ishte tip i komunikueshëm, por nuk e mendonin se mund të arrinte të kryente këtë krim të rëndë. Mbeten ende të paqarta rrethanat e konfliktit mes Canajt dhe Saraçit, por nga hetimet e para dyshohet se përplasja mes tyre ka ndodhur për motive banale, pas një zënke me fjalë.

Pasi ka marrë shërbimin e duhur, Canaj ka shkuar në gardërobë dhe prej andej ka dalë me një bidon benzine.

Ai ka rendur në dhomën ku ndodhej Saraçi me katër pacientë të tjerë dhe pasi i ka hedhur benzinën në trup, i ka vënë flakën.

Nga zjarri që ndezi e ka pësuar edhe vetë autori që ndodhet në rrezik për jetën, pasi mjekët konfirmojnë se ka djegie në 90 për qind të trupit./mapo.al/