I-Phone dhe varëse floriri për mësuesit në Berat

Atmosferë e gëzueshme nëpër oborret e shkollave të mesme dhe ato 9-vjeçare në Berat. Të parëve që u ka qeshur fytyra kanë qenë shitësit, të cilit në këtë 7 Mars, nuk kanë dalë fort keq, pasi të ardhurat e tyre kanë qenë të larta, por nga ana tjetër edhe mësuesit kanë mbetur të kënaqur, pasi dhuratat kanë qenë goxha të shtrenjta.

Festa

Që në orët e para të mëngjesit nëpër rrugët e qytetit, ditën e djeshme kanë lëvizur furishëm fëmijë me dhurata të ndryshme nëpër duar. Vrapimi i tyre i shpejt kishte vetëm një destinacion “mësuesin e tyre kujdestar”. Nëpër duart e fëmijëve të shkollave 9-vjeçare më shumë binin në sy buqetat me lule dhe kartolinat e urimit, ndërsa më ndryshe paraqitej atmosfera në gjimnazet e qytetit. Aty, ku dhe nxënësit ishin më të rritur dhe më të kuptueshëm edhe dhuratat kanë qenë më domethënëse. Një grup nxënësish, të cilët nuk pranuan të identifikoheshin, bënë të ditur për gazetën “Telegraf”, se kishin mbledhur 120 mijë lekë të vjetra dhe me to i kishin blerë mësuese së tyre një varëse floriri. Nxënësit ishin skeptik kur i pyetëm pse janë mbledhur kaq shumë lekë, kur fare thjesht mund t’i kishin dhuruar një buqetë me lule, por ata u shprehën se, kjo shumë nuk ishte asgjë e krahasuar me klasën tjetër paralele, ku ata kishin mbledhur 400 mijë lekë të vjetra dhe i kishin blerë mësuesit të tyre një celular i-Phone. Nxënësit thanë se, jo të gjithë kishin vënë një shumë lekësh të barabartë, pasi jo të gjitha familjet janë në kushte të mira ekonomike, por ka pasur dhe nga ata që kanë vendosur nga 20 apo 30 mijë lekë, (që kanë qenë kryesisht djemtë), pasi duan të marrin edhe ndonjë notë të mirë apo edhe notë kaluese. Sipas nxënëse ata i kanë çuar edhe një listë mësuese së tyre, ku përbri emrit kishin shënuar edhe lekët që kishte vënë gjithsecili.

Tregtarët

Është për t’u theksuar se këto dhurata janë bërë nga nxënës që familja e tyre ka një potenciale të larta financiarë, por mesa duket ka qenë dëshira e vetë prindërve dhe të nxënësve që të bëjnë të tilla dhurata me çmime kaq të shtrenjta. Dhe vetë tregtarët e dyqaneve të floririt dhe ato të luleve kanë qenë me fat për këtë festë se kanë bërë xhiro të mirë, por disa nga këtë janë befasuar se kur kanë kërkuar nxënësit që të blejnë varëse floriri për mësuesit e tyre. Në këtë festë të “7 Marsit” ditën e mësuesve, nxënësit janë ndarë në dy grupe kjo jo se dallojnë nga njëri-tjetri, por nga ana e dhuratave të varfrit dhe të mesmit kanë blerë tufa me lule si dhurata për mësuesit e tyre dhe kjo është një kulturë, por grupi tjetër i nxënësve është ai me potencialë të madhe financiarë, të cilët kanë blerë dhurata më të shtrenjta, si varëse floriri, vëthë, telefona, apo dhe dhurata për shtëpinë e mësuesve etj.. Por nuk kanë munguar dhe dhurata të tjera si ato veshmbathje, ku shumë nxënës kanë blerë dhe copa për fustane dhe bluza të ndryshme. Është për t’u theksuar se kjo festë ka bashkuar nëpër koktejet e organizuara nga Bashkia e Beratit mësuesit duke mos marrë parasysh edhe bindjet partiake.

Mësuesit mbushen me dhurata dhe drekojnë buzëdetit




Vlorë- Një ditë e bukur me diell, sido që e ftohtë, ka gjallëruar Festën e Mësuesit në Vlorë. Nxënësit kanë vërshuar që në mëngjes drejt mësueseve të tyre me buqeta lule e dhurata nga më të shtrenjtat. Drejtues të pushtetit vendor, të Drejtorisë Arsimore kanë përshëndetur nëpër shkolla festën, ndërsa nuk kanë munguar edhe koncerte dhe takime brezash të mësuesve sikurse ndodhi në komunën e Shushicës. Sido që e paligjëruar Festa e 7 Marsit, mësues e nxënës janë argëtuar në këtë ditë të parë të javës. Pasi kanë marrë dhuratat, kolektivat mësimore kanë drekuar e vallëzuar në lokalet buzëdetit, deri në Orikum dhe Llogara, duke qëndruar deri në orët e vona. Nxënësit e kanë festuar ditën e edukatorëve të tyre duke kaluar ditën në disko dhe PUB-e. Kësisoj 7 Marsi, ka rënduar disi ekonominë e familjeve vlonjate që kanë fëmijët në shkolla, duke blerë dhurata e konsumuar pije dhe ëmbëlsira nëpër PUB-e. Nesër, e kanë radhën gratë, që festën e tyre e kalojnë grupe-grupe duke drekuar e vallëzuar në lokale

Kryebashkiaku

Kryetari i Bashkisë së Vlorës, Shpëtim Gjika, përshëndeti për festën. Ai tha: “Dita e 7 Marsit është një moment i rëndësishëm në historinë shqiptare të dijes. Ajo pasqyron në vetvete rrugën e vështirë për mbijetesën dhe vetëdijen tonë kombëtare në shekuj, si dhe rrugën e gjatë të krijimit e konsolidimit të sistemit arsimor, si dhe refleksionet e këtij sistemi përballë sfidave të reja të kohës sonë në rrugën e integrimit europian. 7 Marsi sjell në kujtesën tonë të përbashkët dhjetëra emra mësuesish e edukatorësh, ndër më të shquarit e të spikaturit në periudha të ndryshme të arsimit në Vlorë, shembuj të sakrificës dhe pse jo, të heroizmit, të cilët kanë kultivuar krahas të tjerash edhe vlerat më të mira të patriotizmit e të atdhedashurisë, duke e përvijuar atë si një ditë-simbol të arsimit, por, po aq edhe e edukimit atdhetar, patriotik e qytetar etj”...

Zenepe Luka
/telegraf/