At Nikolla Marku: Janullatos, në emër të kujt do t’i japësh dorën Papa Franceskut?

ELBASAN- Vizita e papa Franceskut në Tiranë më 21 shtator jo vetëm që ka hasur polemika në lidhje me sheshin “Nënë Tereza”, mes qeverisë dhe Bashkisë së Tiranës, sa i takon meritave për organizimin dhe rikonstruksionin e tij, tanimë dhe mes përfaqësuesve fetar. Një rasti i tillë është ai i Kishës Ortodokse "Shën Maria" në Elbasan, me në krye At Nikolla Markun, i cili i ka kërkuar kryepeshkopit ortodoks Janullatos shpjegime në lidhje se me çfarë tagri do shkoj ai në takim me Papën.

Për At Nikolla Markun, Janullatos përfaqëson një shovinizëm ekonomik, territorial, politik në dëm të sovranitetit shqiptar. “Në emër të kujt do ti japësh dorën, ti Janullatos, Papa Franceskut?! Ti përfaqëson kishën e ortodoksëve të Shqipërisë, kur je stërnipi i Kozmait famëkeq të fanarit të Greqisë?! Ti përfaqëson një shovinizëm ekonomik, territorial, politik në dëm të sovranitetit të kombit shqiptar.”

At Nikolla Marku ka vazhduar më tej, duke iu drejtuar Papa Franceskut se Janullatosit mendon se përfaqëson ‘tolerancën fetare’. “Papa Francesku! Ju e vlerësoni Shqipërinë si simbol të harmonive fetare. Po! Është e vërtetë. Shqipëria e tillë është ndër shekuj. Por këtij Janullatusi i është fiksuar në kokë që është ky harmonia në Shqipëri. Ai gënjen”, -është shprehur At Nikolla Marku. At Nikolla Marku e ka mbyllur deklaratën e tij duke shtuar se Janullatos nuk është nga Shqipëria dhe si i tillë, s’mund të jetë njeriu shpirtëror i besimit ortodoks shqiptar.

(ed.me/BalkanWeb)