Kush është “kamzhiku” i Führerit, Kristos Papas?

Kush është Kristos Papas, i cili ditët e fundit po cilësohet “kamzhiku” i Führerit?

Kristos Papas ka lindur në vitin 1962 në Athinë, por origjina e tij është nga Laka e Sulit, nga një familje që i ka dhënë Greqisë priftërinj dhe ushtarë. Babai i tij Ilias Papas, ka qënë toger, bashkëpunëtor i ngushtë i ish-diktatorit Jorgos Papadopulos.

Kristos Papas ka shërbyer 26 muaj në marinë. Që nga rinia e hershme ai merret me politikë, në mbrojtjen e ideve nacionaliste.Kristos Papas është bashkëthemeluesi dhe ideologu i partisë Agimi i Artë, që pretendon se ka në bazë të programit të saj, tripiktun Atdhe-Fe-Familje.

Ai për shumë vjet ka punuar duke shkruar në revista dhe gazeta, ndërsa në shtëpinë e tij botuese "Ilioforos", boton libra me përmbajtje nacionaliste, historike etj.
papas i ri
Gazetat greke shkruajnë se nuk është e rastësishme që kreu i partisë Nikos Mihaloliakos e vuri Kristos Papas në krye të listës së deputetëve, pasi ai është jo vetëm një nga bashkëthemeluesit e lëvizjes që më pas u kthye në parti, por nëpërmjet publicistikës së tij ka dëshmuar një përkushtim ekstrem ndaj idealit dhe qëllimit të Partisë, që sipas tyre, janë helenizmi dhe ortodoksia.

Papas është kryetari i grupit parlamentar dhe shef i sektorit të politikës së jashtme në parti. Si kreu i grupit Parlamentar të partisë, ka qenë tepër aktiv në jetën parlamentare me fjalime e interpelanca, ku në krye të axhendës kanë qenë gjithmonë çështja e emrit të Maqedonisë, ajo e Epirit të veriut, zonave ekonomike ekskluzive dhe emigracioni i paligjshëm, pa lënë mënjanë temat ekonomike, të mprehta për Greqinë sot. Ekstremistët e djathtë fajësojnë për situatën ekonomike qeveritë greke, që sipas tyre, e kanë shitur vendin tek të huajt

Kristos Papas është zëri kryesor i partisë nëpër intervista televizive apo në gazeta duke shpalosur programin, idetë dhe qëllimet e partisë së tij, pasi pjesa tjetër e kësaj partie nuk duket se shpenzon ndonjë pjesë të kohës mbi libra.
papas kakavije
Kryetari i deputetëve të Agimit të Artë shpeshherë ka tërhequr vëmendjen në mënyrë negative për shkak se kurrë, as në parlament nuk e ka mohuar se ai adhuronte Hitlerin.

Ai ishte njëri prej protagonistëve kryesorë, që sulmuan regjisorin shqiptar Laert Vasili, pas vënies në skenë të “Corpus Christi” dhe udhëheqës i protestës së neonazistëve në pikën kufitare të Kakavijës, pas incidenteve me Kishën e Përmetit.

Kristos Papas është i fundit i arrestuar, i anëtarëve të Grupit Parlamentar të Agimit të Artë, pasi u dorëzua dje në mesditë në drejtorinë e policisë, ku as i prangosur nuk hoqi dorë nga retorika e ashpër dhe kërcënimet.
papas pranga
Kristos Papas konsiderohet nga prokuroria greke si zëvendëskryetari i organizatës kriminale të Agimit të Artë.

Sipas raportit të prokurorisë, organizata funksionon në këtë mënyrë: “Urdhëri kalon nga shefi tek zëvendëshefi dhe në vazhdim, nga ky tek vartësit më të ulët në hierarki, deri në zbatimin përfundimtar”. Pra Papas është hallka më e rëndësishme e zinxhirit pas kryetarit të partisë, për çdo vendimmarrje.

Është i martuar dhe babai i tre fëmijëve.

(Balkanweb)