EGJIPT – TË PAKTËN 600 TË VDEKUR DHE 9000 TË PLAGOSUR

Puçistët kryejnë masakra në Egjipt.

Forcat e sigurisë së Egjiptit ndërhynë ndaj manifestuesve në sheshet Rabiatul Adevije dhe Nahda të Kajros.

Sipas deklaratës së Vëllezërve Myslimanë numri i të vdekur është mbi 600, ndërsa ai i të plagosurve është rreth 9 mijë.

Bëhet e ditur se kontrolli në sheshin Nahda ka kaluar plotësisht në duart e puçistëve. Përleshjet vazhdojnë edhe në qytete të tjera të vendit duke shkaktuar shumë të vdekur, thuhet në lajmet e tjera që vijnë nga terreni.

Bashkimi Evropian deklaroi se ndjen shqetësim për zhvillimet e fundit në Egjipt.

Ndërhyrja filloi në orët e hershme të mëngjesit. Gjatë operacionit që filloi në sheshet Rabiatül Adevije dhe Nahta të Kajros me mbështetje nga ajri me helikopterë, forcat e sigurisë hapën zjarr në drejtim të paditur ndaj manifestuesve.

Burimet nga Ministria e Brendshme deklaruan se çadrat e vendosura në sheshin Nahda janë hequr dhe djegur ndërsa sheshi është zbrazur plotësisht.

Ndërsa në sheshin Adevije vazhdojnë të shtënat me armë zjarri ndaj manifestuesve.

Pretendohet se forcat e sigurisë ndihmohen nga grupet e armatosura të quajtur “sëpatarët”.

Forcat e sigurisë mundohen të shpërndajnë popullin që tenton të hyjë në sheshet kryesore të kryeqytetit duke përdorur bomba me gaz lotsjellës.

Ministria e Brendshme deklaroi se gjatë ndërhyrjes kanë qenë të angazhuara vetëm forcat policore për ndërhyrje të shpejta, ndërsa ushtria nuk ndërhyri në dy sheshet e Kajros.

Ndërkohë që gazetarët e huaj njoftojnë se nëpër rrugë kanë numëruar të paktën 40 persona të vrarë, bëhet e ditur se para Fakultetit të Inxhinierisë të Universitetit të Kajros ndodhen një numër i madh i kufomave.

Sipas disa burimeve numri i të vrarëve thuhet se është mbi 2.000 persona ndërkaq njoftohet se në mesin e të plagosurve ka edhe fëmijë.

Burimet e Vëllezërve Myslimanë u bënë thirrje policëve dhe ushtarëve të mos u binden urdhrave, ndërsa popullit i bënë apel të derdhet nëpër rrugë.

Zyrtarët e spitalit fushor në sheshin Adevije njoftojnë se ushtarët e kanë ndërprerë energjinë elektrike për të parandaluar mjekimin dhe kurimin e të plagosurve.

Njoftohet se edhe autoambulancat që transportojnë të plagosurit për në spitalet fushore pengohen nëpër rrugë.

Ministria e Brendshme e Egjiptit urdhëroi ndërprerjen e qarkullimit të trenave në kryeqytet me qëllim të parandalimit të largimit të protestuesve nga Kajroja dhe të ardhjes të tjerëve për ndihmë.

Në mesin e 200 personave të ndaluar në polici gjatë ngjarjes ndodhen edhe udhëheqësit e lartë të Vëllezërve Myslimanë, për të cilët është lëshuar fletarresti.

Ndërhyrja e përgjakshme në Kajro nxiti protestat edhe në qytete tjera të vendit.

Njoftohet se në qytetet Minja dhe Asuit po jetohen përleshje mes protestuesve dhe policisë.

Pretendohet se protestuesit kanë rrethuar drejtoritë e policisë në këto qytete.

Ndërsa në qytetin Marsa Matruh protestuesit bastisën kuvendin vendor popullor dhe rrethuan disa rajone të policisë.

Ndërkohë që në qytetin Aleksandri me mijëra protestues janë derdhur nëpër sheshe, njoftohet se edhe në qytetet Suez, Ismailije dhe Port Said, qytete që ndodhen përgjatë kanalit të Suezit, populli është derdhur nëpër rrugë për të protestuar masakrën e mëngjesit të sotëm në Kajro.

Bëhet e ditur se Banka Qendrore e Egjiptit dhe bankat tjera janë urdhëruar për ti ndërprerë të gjitha veprimet e transaksioneve.

Bashkimi Evropian publikoi një komunikatë në lidhje me ngjarjet ku shprehet shqetësimi i madh nga vrasjet në Egjipt.

Në komunikatë thuhet se dhuna nuk është zgjidhje dhe nga autoritetet kërkuan të përmbahen.

Shefja e diplomacisë evropiane, Catherine Ashton, shprehu sot shqetësimin e saj të madh pas ndërhyrjes së përgjakshme të autoriteteve egjiptiane ndaj mbështetësve të presidentit të rrëzuar, Mohamed Morsi duke u bërë thirrje forcave të rendit për vetëpërmbajtje.

"U bëj thirrje forcave të rendit të vetëpërmbahen si dhe të gjithë qytetarëve egjiptianë të mos bien pre e provokimeve të përsëritura dhe të shmangin përshkallëzimin e dhunës", citon komunikata e Ashton.

"Përleshjet dhe dhuna nuk janë rruga drejt zgjidhjes së çështjeve kyçe politike", theksoi përfaqësuesja e BE-së për Punët e Jashtme.

Duke theksuar rëndësinë e dialogut mes të gjitha palëve të përfshira, ajo rikujtoi domosdoshmërinë e krijimit të një qeverie civile dhe sigurisë së funksionimit të institucioneve demokratike.

"Në të njëjtën kohë, të gjitha palët duhet të pranojnë përgjegjësinë e tyre në mënyrë që manifestimet të jenë më paqësore dhe t'i jepet fund nxitjes së dhunës", shtoi ajo.

Edhe Shtetet e Bashkuara të Amerikës morën vendim për ndalimin e të gjitha veprimeve konsullore në ambasadën e saj në Kajro.

Nga ana tjetër Katari, mbështetësi kryesor i Vëllazërisë Myslimane, dënoi sot ashpër ndërhyrjen me forcë të policisë egjiptiane kundër mbështetësve të presidentit të larguar nga pushteti nga forcat e armatosura, Muhamed Mursi.

''Katari ka dënuar me forcë metodën e përdorur kundër manifestuesve paqësorë (...) që ka shkaktuar vdekjen e një numri të konsiderueshëm civilësh të pafajshëm dhe të paarmatosur'', deklaroi një zëdhënës i Ministrisë së Jashtme të Katarit.
/trt/