Promovohet libri “Kurani dhe Njeriu”

Autori Xhemal Balla falënderoi pjesëmarrësit që iu përgjigjën ftesës për të marrë pjesë në këtë aktivitet promovues dhe në këtë muaj të begatë të Ramazanit ku, siç u shpreh ai, ne si besimtarë ndihemi më të gëzuar dhe më afër njëri-tjetrit.

Prof. Bedri Telegrafi vlerësoi kontributin dhe sendërtimin e këtij libri. Në fjalën e tij, studiuesi Telegrafi i bëri një analizë të hollësishme librit dhe autorit si dhe evidentoi disa nga temat më të rëndësishme të trajtuara me kujdes dhe kompetencë prej tij.

Ndërsa më pas fjalën e mori Myftiu i Tiranës, H. Ylli Gurra, i cili në fjalën e tij vlerësoi kontributin disavjeçar të studiuesit Balla, për t’i dhënë myslimanëve por edhe publikut të gjerë botime me mjaft vlera.

“Falënderojmë shoqatën “Hafiz Ibrahim Dalliu” për këtë aktivitet në këtë ditë të veçantë dhe në këtë muaj të begatë, që na mblodhi për të kujtuar një nga emblemat e kulturës islame shqiptare si H. Ibrahim Dalliu. Një urim special dua të përcjell në adresë të autorit Xhemal Balla për këtë botim, i cili meriton përgëzimet më të mira. I uroj suksese profesorit në jetën e tij dhe në punën e tij domethënëse në interes të kulturës islame dhe asaj shqiptare.”

Më pas imami i xhamisë Dine Hoxha, Ahmed Kalaja, në fjalën e tij vlerësoi si të rëndësishëm faktin që prof. Balla kishte përfshirë në libër jo vetëm artikuj me natyrë fetare, por edhe me ato me natyrë sociale e edukative. “Jam tepër i emocionuar, – u shpreh z. Kalaja, -që marr pjesë në promovimin e librit të profesorit tim dhe njërit prej figurave të shquara të kulturës islame shqiptare.”

Ndërsa vetë autori në fjalën e tij përshëndeti dashamirësinë dhe ngrohtësinë e të gjithë pjesëmarrësve. Ai premtoi se në të ardhmen do të përgatitet edhe numri 4 dhe 5 i këtij botimi, si vazhdimësi e komentit të veprës “Ajka e kuptimeve të Kurani Qerimit” të dijetarit dhe intelektualit mysliman tiranas Hafiz Ibrahim Dalliu.

“Si nxënës i H. Dalliut, – tha z. Balla, – duke e parë portretin e tij si teologun e thelluar në dijet e fesë islame, botova librin e parë për jetën dhe veprën e tij dhe pastaj iu përkushtova studimit për të sjellë sot para myslimanëve, por jo vetëm, komentin e Kuranit nga H. Ibrahim Dalliu, vetëm se e solla me një titull të ri “Kurani dhe njeriu”. Duke qenë se Kurani është themeli i fesë islame, vura përballë njeriun. Në këtë libër jam përpjekur që të sjell argumente për lexuesin se jeta nuk ka lindur rastësisht dhe me evolucionin, por është krijuar nga një fuqi madhore inteligjente, që njihet me emrin Allah. Ai i drejtohet njeriut: vrojto, zbulo, argumento e pastaj beso.”

Më tej studiuesi Balla vlerësoi punën e shoqatës “Hafiz Ibrahim Dalliu”, e cila sipas tij është përpjekur të ngrejë lart figurën e këtij dijetari të madh islam, në mënyrë që vepra e tij të shërbejë shembull frymëzimi jo vetëm për besimtarët por edhe për brezin e ri.

Në fund të aktivitetit për pjesëmarrësit u dhurua një kopje e librit “Kurani dhe Njeriu”.