Talasemia zbulohet që në fetus, analizat që duhen

Nga: OLA MITRE


Rreth 400 persona në vendin tonë vuajnë nga sëmundja e Talasemisë ose thënë ndryshe anemia mesdhetare, duke e renditur Shqipërinë si një ndër vendet me numrin më të lartë të të prekurve nga kjo sëmundje. Sipas specialistëve, Talasemia mund të zbulohet që në shtatzëni e në këtë mënyrë prindërve u jepet mundësia për të vendosur që në hapat e parë nëse dëshirojnë ta mbajnë këtë fëmijë apo jo. Sipas mjekes onkohematologe pediatre pranë Qendrës Spitalore Universitare “Nënë Tereza”, Eleni Anastasi, rreth 7.1% e popullsisë në vendin tonë janë mbartës të anemisë mesdhetare, ndërkohë që në 25% të rasteve ata kanë mundësi të lindin fëmijë të sëmurë. “Rreth 7.1% e popullsisë te ne janë mbartës, ndërsa kemi rreth 400 talasemikë. Dy prindër mbartës kanë probabilitet që në çdo shtatzëni, 25% të lindin fëmijë të sëmurë, 25% të lindin fëmijë të shëndoshë dhe 50% të lindin fëmijë mbartës të sëmundjes”, shpjegon mjekja. Gjithashtu, ajo shprehet se një analizë në javën e 14-16 të shtatzënisë zbulon nëse fetusi është i sëmurë apo i shëndetshëm. “Çdo çift, para se të sjellë në jetë një fëmijë duhet të bëjë dhe një elektroforezë hemoglobine. Ndërkohë që në javën e 14-16 vjeç përcaktohet nëse fetusi ka sëmundjen e Talasemisë apo jo”, - shpjegon Anastasi.
Kurimi
Talasemia mund të shërohet vetëm nëse të sëmurit i bëhet transplanti i plotë i palcës së kockës, ndërsa nëse kjo ndërhyrje rezulton e suksesshme, ai shërohet plotësisht. “Shpeshherë thuhet që Talasemia shërohet përmes transplantit të palcës kurrizore. Kjo është e gabuar, pasi Talasemia shërohet vetëm nëse bëhet transplanti i palcës së kockës. Për të kryer këtë ndërhyrje nevojitet një donator, që mund të jetë vëllai apo motra e të sëmurit. Padyshim që dhuruesit nuk i shkaktohet asnjë dëmtim. Jo gjithmonë fëmijët e të njëjtës familje përputhen me njëri-tjetrin, por ajo që mund të thuhet është fakti se në Shqipëri kjo ndërhyrje nuk mund të realizohet ende”, - shpjegon mjekja onkohematologe pediatre, ndërsa thekson se në moshat e vogla deri në 10 vjeç, suksesi është i garantuar në rreth 97% të rasteve.
Trajtimi
Për të gjithë të prekurit nga Talasemia është i mundur edhe trajtimi i tyre përmes transfuzionit të gjakut. Ata duhet t’i nënshtrohen atij çdo 2 apo 3 javë, ndërsa kjo u garanton atyre një jetë normale. Problemi qëndron se këto transfuzione rritin ndjeshëm sasinë e hekurit në gjak, i cili kthehet në një problem për këta pacientë. Ndaj ata duhet t’i nënshtrohen terapisë ferrokelante. Anastasi sqaron se tashmë te ne ekzistojnë të tria medikamentet e nevojshme, që rimbursohen në masën 100% nga shteti.
(e.m/GazetaShqiptare/BalkanWeb)