Ekstradohet Assange per ne Suedi

Gjykata britanikë i ka hapur rrugë sot ekstradimit të themeluesit të Wikileaks, Julian Assange në Suedi, ku akuzohet për krime seksuale. Kurse avokatët e Assange, i cili ka ngjallur zemëratën e qeverisë amerikane pas përhapjes së mijëra kabllogrameve të diplomacisë amerikane, pohuan se Julianit nuk do t’i garantohej një proces i drejtë në Suedi. Por ja që gjyqtari Howard Riddle nuk ka dashur të dëgjojë arsyetime, megjithatë avokati Geoffrey Robertson ka deklaruar se do të apelojë vendimin brenda 7 ditëve, siç parashikohet nga ligji. Ai do të mbështetet te fakti se në Suedi, seancat gjyqësore mbahen me dyer të mbyllura dhe kjo do të përbënte një dhunim të të drejtave njerëzore. Ndër të tjera, asaj që duket se i tremben më shumë avokatët e Assange është se ekziston rreziku që Stokholmi t’ia dorëzojë SHBA-ve, aty ku autoritetet e kanë shpallur prej kohësh në kërkim për shkak se u ka publikuar dokumente sekretë.