Lindi beben në koma, nëna: Ju tregoj historinë time

TIRANE- Ajo priste të lindte fëmijën e saj të parë, ndërsa gjatë shtatzënisë nuk kishte patur asnjë komplikacion shëndetësor. Gjithçka do të shfaqej në muajin e nëntë, kur një ndërlikim në rrugët e frymëmarrjes do alarmonte mjekët gjinekologë. Ata e transportuan 30- vjeçaren në Spitalin Universitar "Shefqet Ndroqi", ku edhe do të lindte vogëlushen me emrin Klea. Gjatë lindjes, nëna e re bie në koma, ndërsa mrekullisht do të zgjohej 2 ditë pas saj.

Patris Lika, e shtruar në dhomën Nr.2 te Kirurgjia e ish-sanatoriumit, në këtë intervistë dhënë për "Gazeta Shqiptare" rrëfen gjithçka që nga momenti i komplikacioneve, deri te ndjesitë kur mbajti për herë të parë në krahë beben e saj.
Patris, si ndjehesh?
Më mirë, përmirësohem dita ditës. Tani jam pak më mirë sepse në fillim kisha dhe të vjella dhe isha shumë keq. Ndjehesha e lodhur.
A e ke parë vajzën?
Po dje ma sollën.
Ti e ke parë atë disa ditë pas lindjes. Çfarë ndjeve? Si t'u duk?
Mirë shumë. Shumë e bukur. Kur e pashë për herë të parë pata një ndjesi të çuditshme. Thashë më rëntë pika si nuk isha që në fillim me të.
A kishe probleme gjatë shtatzënisë?
Gjatë 9 muajve të shtatzënisë nuk kisha probleme fare. Në muajin e 9-të pata ca probleme me frymëmarrjen dhe një nga kushërinjtë e mi, që është mjek më rekomandoi të shkoj të vizitohem te materniteti "Mbretëresha Geraldinë". Ata më sollën menjëherë në sanatorium dhe nata e parë që u shtrova kaloi si kaloi. Ndërsa, në datën 29 janar, pra pas natës së parë që u shtrova vjen direkt një grup mjekësh nga materniteti "Koço Gliozheni".
Çfarë ndodhi më pas?
Më pas unë linda. Menjëherë pas lindjes rashë në gjendje kome. Nuk e kam ndjerë fare se çfarë ndodhi.
Në gjendje kome re pas lindjes?
Po, pas lindjes dhe nuk kam ndjerë asgjë.
Domethënë pas lindjes nuk e ke parë vajzën. . .
Jo, nuk e pashë. Isha dy ditë në gjendje kome.
A mban mend ndonjë gjë para se të lindje?
Mbaj mend vetëm që mjekët më thonin Patris je mirë, mos u shqetëso.
Po momentin e lindjes e mban mend?
Jo, sepse po lindja me operacion. Pastaj unë qëndrova këtu, ndërsa vajzën ma çuan te materniteti "Koço Gliozheni".
Po në momentin që u zgjove nga koma?
Nuk e kujtoj shumë mirë, por kisha mamin te koka. Më qëndroi gjatë gjithë kohës pranë. Doja të shihja vajzën, por nuk ma sollën menjëherë.
Si e quajtët vajzën?
Klea.
Ju punoni? Me çfarë merreni?
Unë jam në shkollë. Studioj për psikologji në një universitet privat.
Po bashkëshorti?
Ai për momentin është në punë part-time.
Kur do të dalësh nga spitali? A të kanë thënë gjë mjekët?
Ende nuk e di. Nuk më kanë thënë gjë.
(m.a/Gazeta Shqiptare/BalkanWeb)