STAMBOLL - NISIN PUNIMET E SAMITIT TË ISLAMOFOBISË

"Samiti i Islamofobisë", organizuar nga Ministria turke e Rinisë dhe Sportit, filloi punimet në Stamboll. Mesazhi i përbashkët i samitit, ku do të merret në shqyrtim islamofobia, është: "Të ndryshojë gjuha e medias për t'i dhënë fund islamofobisë."Në vlerësimin e tij rreth kësaj teme, ministri turk i Rinisë dhe Sportit, Suat Këllëç u shpreh me këto fjalë: "Media duhet të pyesë veten. Shtypi vendas dhe i huaj duhet të t'i kërkojë vetes llogari për gabimet lidhur me islamofobinë. Ashtu siç e kemi theksuar vazhdimisht, ky nuk është një keqkuptim, por një sulm sistematik."

Media ka luajtur dhe luan një rol të rëndësishëm në këtë sulm të vetëdijshëm.

Pjesëmarrësit në samit nënvizojnë domosdoshmërinë e përkujdesjes, që duhet treguar për sa i takon gjuhës së lajmeve.

Ndihmësnënsekretari i Kryeministrisë së Turqisë, Ibrahim Kallën vuri në pah se titujt e gazetave dhe televizionet u japin trajtë perceptimeve në mendjet e njerëzve dhe shtoi: "Prandaj gazetarët kanë një përgjegjësi të madhe. Ata duhet të veprojnë me ndjeshmëri të lartë në këtë çështje."

Të vendosur për ta thyer këtë paragjykim janë edhe gazetarët pjesëmarrës nga vende të ndryshme të botës.

Redaktori i gazetës britanike "The New Statesman", Deniëll Trilling, i cili tërhoqi vëmendjen se edhe në Angli, ashtu si në shumë vende të tjera, ekzistojnë paragjykime ndaj myslimanëve, sqaroi se paragjykimet në fjalë nuk burojnë nga vet islami, por nga mungesa e komunikimit.

Kurse Sani Handëll, korrespondent i prestigjiozes "The Guardian", tha se distanca që duhet përshkuar në këtë çështje është tepër e madhe dhe nënvizoi se "Turqia është një shembull i mirë për Evropën lidhur me eliminimin e paragjykimeve".

Gjatë samitit u realizua edhe shfaqja gala e dokumentarit me temë islamofobinë "Sprova e Lirisë", që do të transmetohet nga ekranet e kanalit informativ TRT Haber.

I pranishëm në këtë shfaqje gala ishte edhe kryeredaktori i kanalit televiziv TRT Haber, Ahmet Boken./trt/