TURQI-AZERBAJXHAN, MIRATOHET PËRFUNDIMISHT GAZSJELLËSI TANAP

Projekti i Trans-Anadollit (TANAP), që parashikon transportimin e gazit natyror të Azerbajxhanit në Turqi dhe nëpërmjet saj në Evropë, mori miratimin përfundimtar. Projekti u pranua në Asamblenë Kombëtare të Azerbajxhanit dhe u dekretua nga Presidenti Ilham Alijev. Kështu TANAP-i hyri zyrtarisht në fuqi.
Presidenca azerbajxhanase miratoi pa bërë ndryshime edhe dy ligje, që ishin miratuar lidhur me projektin e lartpërmendur në Asamblenë Kombëtare të Azerbajxhanit.

Dy ligjet në fjalë parashikojnë transportimin e gazit natyror të Azerbajxhanit në tregun e brendshëm turk me anë të linjave gazsjellëse, që do të ndërtohen në kuadër të Projektit Trans-Anadolli, dhe nëpërmjet Turqisë shitjen e tij në Evropë.

Qeveria e Azerbajxhanit për këtë projekt ka akorduar një buxhet prej 7 miliardë dollarësh. Punimet pritet të përfundojnë brenda një harku kohor 5-vjeçar.

Në fazë të parë drejt Turqisë do të rrjedhin 16 miliardë metër kub gaz natyror, sasi kjo që gjatë viteve në vijim do të rritet gradualisht deri në 30 miliardë metër kub.