“Gaza”, Ambasada Palestineze: Tirana zyrtare të tregojë kujdes në deklarata

TIRANË- Reagon ambasada palestineze në Tiranë lidhur me deklaratën e 16 Nëntorit nga Ministria e Jashtme Shqiptare, duke thënë se me këtë qëndrim Tirana zyrtare bën përgjegjëse palën palestineze për sulmet.

“Bashkësia Ndërkombëtare dhe Kombet e Bashkuara janë në dijeni të plotë dhe e pranojnë faktin se populli palestinez jeton në izolim dhe pushtim të plotë nga Izraeli, si rrjedhojë populli palestinez, –sipas ligjeve ndërkombëtare, ka të drejtë të përdorë të gjitha mjetet për t’u vetëmbrojtur, për të fituar lirine dhe pavarësinë, që të jetojë me dinjitet si cdo popull tjetër në botë”-thuhet në njoftimin e ambasadës palestineze.

“Ne nuk kemi konstatuar më parë asnjë deklaratë, e cila bën përgjegjëse palën izraelite për zgjerimin e territoreve të saj apo për sulmet e armatosura izraelite ndaj popullsisë palestineze, djegies së fshatrave, vrasjen dhe debimin e banorëve të Jeruzalemit, apo duke mbajtuar të izoluar qytetit të Gazës për vite me radhë. Të gjitha këto konsiderohen krime, dhe Izraeli duhet të dënohet nga Gjykata Ndërkombëtare e Krimeve të Rënda, megjithëse ne kemi kërkuar nga Izraeli më shumë se disa herë që të ndalohet pushtimi, duke respektuar ligjet ndërkombëtare”-vijon më tej deklarata e ambasadës palestineze në Shqipëri.

Në 16 Nëntor, Ministria e Punëve të Jashtme e Shqipërisë shprehu shqetësimin për situatën e tensionuar në jug të Izraelit dhe Rripin e Gazës, duke thënë se dënon ashpër sulmet raketore të Hamasit dhe fraksionieve të tij kunder Izraelit dhe bën thirrje për ndalimin e menjëhershëm të dhunës dhe për rivendosjen e paqes.

DEKLARATA E MINISTRISË SË JASHTME SHQIPTARE
Ministria e Punëve të Jashtme e Republikës së Shqipërisë shpreh shqetësimin për situatën e tensionuar në jug të Shtetit të Izraelit dhe në Rripin e Gazës. Ministria e Punëve të Jashtme të Shqipërisë dënon ashpër sulmet raketore të Hamasit dhe fraksioneve të tij kundrejt Shtetit të Izraelit dhe bën thirrje për ndalimin e menjëhershëm të dhunës dhe për rivendosjen e paqes.

“Njëkohësisht, kërkojmë nga palët të ndërmarrin veprimet e duhura për uljen e tensioneve dhe respektimin e ligjeve ndërkombëtare me qëllimin për të shmangur çdo cenim të sigurisë të jetës së civilëve”, citon Ministria e Punëve të Jashtme të Shqipërisë në një njoftim për shtyp shpërndarë për mediat më 16 Nëntor.
(e.m/News24/BalkanWeb)