Kanceri i avancuar i gjirit, vjen ilaçi që zgjat jetën

NGA: OLA MITRE


TIRANE-Një lajm i mirë vjen për të gjitha gratë e diagnostikuara me kancer të avancuar të gjirit. Së fundmi, në vendin tonë kanë hyrë preparate të cilat rrisin jetëgjatësinë e pacientes në faza të avancuara.
Lajmin për “Gazeta Shqiptare” e jep specialistja e Institutit të Shëndetit Publik, Lumturi Mërkuri. “Me mjekimet e reja në dispozicion, tani ka shpresë edhe për gratë me kancer të avancuar të gjirit. Trajtimet e reja vonojnë progresin e sëmundjes shumë më mirë se preparatet e deritanishme, disa prej të cilave përdoren për trajtimin e grave pas dështimit të trajtimit me terapi të tjera. Këto preparate ripërcaktojnë ecurinë e zhvillimit të kancerit të avancuar të gjirit, duke ofruar një mundësi të re si për pacientët ashtu edhe për mjekët”, - shpjegon Mërkuri. Për marrjen e këtij medikamenti specialistja e ISHP-së sqaron se një grua, e cila vuan nga kanceri i gjirit duhet të drejtohet tek mjeku specialist për të përfituar nga arritjet e reja të shkencës. “Të marrësh sot diagnozën e kancerit të avancuar të gjirit mund të jetë shumë e vështirë dhe e frikshme, por këto gra nuk janë vetëm dhe për to ka gjithmonë shpresë nëpërmjet trajtimeve të reja”, - thotë specialistja.
Zbulimi i hershëm
Megjithatë, sipas Mërkurit zbulimi i hershëm i kancerit të gjirit mbetet shumë i rëndësishëm. “Diagnoza e hershme mbetet një strategji e rëndësishme e zbulimit të hershëm, veçanërisht në vendet në zhvillim siç është edhe vendi ynë, ku sëmundja diagnostikohet në faza të vona”, - thotë Mërkuri. Strategjitë e rekomanduara për zbulimin e hershëm janë rritja e ndërgjegjësimit për kapjen e hershme të shenjave nëpërmjet vetekzaminimit të gjirit, ekzaminimit klinik të gjirit dhe mamografisë për të identifikuar individët me një anomali që sugjeron për kancer.
Rastet
Rritja e jetëgjatësisë, urbanizimi dhe adaptimi në rritje i një stili jetese perëndimor janë ndër përcaktuesit e rëndësishëm në rritjen e incidencës së kancerit të gjirit në vendet në zhvillim. Sipas të dhënave të Institutit të Shëndetit Publik, në Shqipëri kanceri i gjirit është kanceri që haset më shpesh dhe zë vendin e parë ndër shkaqet e vdekjeve tek femrat mbi 50 vjeç. Prej kancerit të gjirit vitet e fundit janë prekur rreth 450-500 gra çdo vit. “Për t’u shënuar mbetet fakti që rastet me kancer të gjirit, tek ne paraqiten në faza shumë të avancuara, ndërkohë që vihet re një tendencë e prekjes edhe të moshave më të reja”, - thotë Mërkuri.
Mamografia
Mamografia është një lloj radiografie e gjirit, e cila e kap kancerin e gjirit në faza shumë të hershme, atëherë kur ndryshimet nuk mund të shihen me sy apo të preken me dorë. Të gjitha femrat 40-50 vjeç e lart e në veçanti ato që kanë faktorë brisku, duhet të bëjnë një mamografi çdo 1-3 vjet. Ajo mund të bëhet në çdo kohë, por është mirë që femrat në moshën riprodhuese ta kryejnë mamografinë në fund të periodave, ose 3-4 ditë mbas tyre. Nuk duhet ndonjë përgatitje e veçantë përpara mamografisë.

(d.b/GazetaShqiptare/BalkanWeb)