Merkel: Islami është pjesë e jona

Kancelarja gjermane Angela Merkel e ka cilësuar fenë islame si pjesë të Gjermanisë, dhe u ka bërë thirrje bashkëqytetarëve të saj që të tregojnë tolerancë ndaj 4 milion myslimanëve të këtij vendi.
Në një takim të zhvilluar me anëtarët e partisë konservatore Unioni Kristian- Demokratik, Merkel u shpreh se “Gjermania duhet të jetë më tolerante ndaj popullatës së saj myslimane”.
“Gjermanët duhet të jenë të hapur ndaj Islamit dhe të thonë: Po, kjo është pjesë e jona. Njerëzit duhet të jenë më të kujdesshëm dhe të bëjnë dallimin midis ekstremistëve dhe vetë fesë. Shumica dërrmuese e myslimanëve në Gjermani janë distancuar nga dhuna e fundit në protesta kundër filmit anti-islam”, tha kancelarja Merkel.
Deklaratat e Merkel pasojnë ato të ish-presidentit Christian Wulff, i cili befasoi opinionin publik në vitin 2010, duke thënë se, “Islami tani i takon edhe Gjermanisë”.
/Drita Islame/