Turqia aktivizohet për çështjen e muslimanëve në Mianmar

nga **emine** Thu Jul 19, 2012 9:21 pm

Turqia është e shqetësuar për dhunën e vazhdueshme kundër muslimanëve Rohingya të Mianmarit dhe synon të sjellë çështjen e tyre në agjendën ndërkombëtare duke thirrur komunitetin ndërkombëtar për t’i dhënë fund heshtjes mbi situatën që po ndodh në këtë vend të Azisë Juglindore, raporton Today’s Zaman.

Kryeministri Erdogan tha sot se Turqia ishte e shqetësuar në lidhje me brutalitetin ndaj muslimanëve në krahinën Arakan, vendi ku është përshkallëzuar dhuna së fundmi në Mianmar në afërsi të Bangladeshit.

“Ne presim më shumë ndërgjegjësim nga komuniteti ndërkombëtar për muslimanët Rohingya, të cilët lanë shtëpitë e tyre, gjësendet dhe tokën për shkak të fanatizmit fetar që po përballojnë,” tha Erdogan,

Ministri i Jashtëm turk Ahmet Davutollu foli me Sekretarin e Përgjithshëm të Organizatës për Bashkëpunim Islam (OBI), z.Ekmeledin Ihsanollu, të dielën në lidhje me dhunën e vazhdueshme kundër muslimanëve në Mianmar, duke diskutuar hapat që duhet ndërmarrë për të ndihmuar në normalizimin e situatës në vend.

Gjithashtu, Drejtoria për Çështje Fetare u ka bërë thirrje organizatave ndërkombëtare, veçanërisht të OKB-së për të mos heshtur ndaj dhunës. Në një deklaratë nga drejtoria thuhet se më shumë se 1000 muslimanë Rohingya që jetojnë në Mianmar janë vrarë dhe më shumë se 90.000 kanë mbetur pa shtëpi pasi dhuna filloi.

Ka figura kundërthënëse në lidhje me numrin e te vrarëve në krahinën Arakan. Një ekip ndihmës i Kombeve të Bashkuara, i cili është i vetmi i lejuar të hyjë në vend, ka thënë se numri i të vrarëve nuk ishte aq i ulët sa thotë qeveria në Mianmar por as aq i lartë sa pretendojnë aktivistët.

Ky ekip gjithashtu pranon se zonat e banuara janë shumë të shpërndara në këtë rajon dhe është e vështirë llogaritja e saktë e vrasjeve.

Presidenti i Mianmarit, Thein ka shpallur gjendjen e jashtëzakonshme ne vend dhe ka vendosur trupa ushtarake për të rivendosur stabilitetin.

Qeveria e Mianmarit refuzon të njohë muslimanët Rohingya si banorë të vendit duke pretenduar dhe duke i klasifikuar ata si emigrant, megjithëse ata jetojnë në Mianmar për breza të tërë