Greqi, rigjykohet pas 2500 vjetësh, Sokrati "babai i Filozofisë"

nga **emine** Sat May 26, 2012 9:55 pm

ATHINE - Në vitin 399 para erës sonë, Sokrati, i njohur si babai i filozofisë, u përball me akuzat se "nuk njeh perënditë e qytetit" (mungesë besimi), dhe se "me idetë e tij afron demonët dhe korrupton të rinjtë". Atëherë, Sokrati u gjykua prej një Gjykate të përbërë nga 500 qytetarë të Athinës, të cilët shpallën fajtor për akuzat e ngritura dhe e dënuan me vdekje.

Ndërkaq dje, rreth 25 shekuj pas dënimit, avokatë e gjyqtarë të shquar nga e gjithë bota u mblodhën në Athinë për të vazhduar gjykimin historik të Sokratit. Paneli i gjykatësve përbëhej nga 10 juristë të gjykatave supreme, nga Britania e madhe, Franca, Zvicra, SHBA, Gjermania, dhe Greqia. Gjyqtarët ishin të ndarë; 5 pro Sokratit dhe 5 pro athinasve, vendim që gjithësesi konsiderohet në favor të të akuzuarit. Edhe audienca në sallë e nxori të pafajshëm filozofin e lashtë me 584 vota në favor të tij dhe 282 kundër. Vlen të përmendet se Gjykata Federale në Nju Jork e ka nxjerrë të pafajshëm Sokratin, në gjykimin e kryer një vit më parë.

Gjyqi historik përfshinte elemente të lashta me konceptet moderne, të dhëna këto me aspektet ligjore dhe me humor, ku qindra spektatorë patën mundësi të përjetojnë një shfaqje të mrekullueshme të së vërtetës së ligjit dhe trashëgimisë greke. Bazuar në burime dhe studime historike e bashkëkohore, por edhe në klimën e debateve të sotme publike, kjo ngjarje përbën interes, sepse idetë për të cilat Sokrati u akuzua para 2500 vjetësh, lidhen me çështje aktuale.

Filozofi i lashtë Sokrati u akuzua sepse publikisht dyshoi për Zotat, që athinasit adhuronin në atë kohë. Punët e tij kanë mbijetuar falë penës së nxënësit të filozofit, Platonit por dhe nga shkrimet e Ksenofonit. Sipas tyre, Sokrati mund të ishte larguar nga Athina, kur u shpall fajtor nga juria e saj, por në të kundërt, ai zgjodhi të qëndronte në qytet. Sipas ligjit, i akuzuari mund të replikonte dhe në fakt as që e mori mundimin për të bindur jurinë se ishte i pafajshëm. Sokrati e interpretoi ekzekutimin e tij duke pirë helm.