Strasburg, Shqipëria merr sot kryesimin e Këshillit të Europës

nga **Albani** Wed May 23, 2012 11:39 am

STRASBURG- Shqipëria merr sot kryesimin e Këshillit të Europës. Mësohet se në Strasburg ka nisur sakaq mbledhja e Komiteti të Ministrave të Këshillit të Europës, ku pritet që Zv.Kryeministri dhe Ministri i Punëve të Jashtme, z. Edmond Haxhinasto, në cilësinë e tij, si President i Komitetit të Ministrave të Këshillit të Evropës, të paraqesë prioritetet dhe aktivitetet e kryesisë së parë shqiptare të këtij organi të rëndësishëm politik të Këshillit të Evropës.

Pas fjalimit, ministrit Haxhinasto do i dorëzohet edhe celësi i presidencës së KiE, ndërsa ceremonia pritet të zhvillohet rreth orës 12:00. Pjesë e delegacionit zyrtar shqiptar në Strasburg janë dhe Ilir Rusmajli, kryetar i delegacionit parlamentar shqiptar në Asamblenë Parlamentar të KiE-se, si dhe Ferdinand Poni, Zëvendësministër i Brendshëm.

Për herë të parë nga anëtarësimi në Këshillin e Evropës, në 13 korrik 1995, Shqipëria do të marrë kryesinë e Komitetit të Ministrave të organizatës, për periudhën 23 maj –9 nëntor 2012. Nëpërmjet kësaj presidence, Shqipëria do të bëhet zëri i përbashkët i 47 vendeve anëtare, nën moton: “Të bashkuar në diversitet”. Marrja e presidencës do të shoqërohet me një ceremoni festive, gjatë së cilës do të ekspozohen objekte me vlerë të trashëgimisë së pasur kulturore dhe artistike shqiptare.
(ma.ar/News24/BalkanWeb)