Kryeparlamentari turk viziton xhaminë e Et’hem Beut

Kryetari i Asamblesë së Madhe të Turqisë, Cemil Çiçek, i cili ndodhet në Shqipëri me ftesë të znj. Jozefina Topalli, zhvilloi paraditen e sotme një vizitë në xhaminë e Et’hem Beut në kryeqytet.

Kryetari Çiçek u prit nga Myftiu i Tiranës Ylli Gurra dhe nga Kryevaizi i Shqipërisë Hafiz Shaban Saliaj. Myftiu Gurra e njohu kryeparlamentarin turk me historinë e kësaj xhamie simbol të Islamit në vendin tonë si dhe rolin e saj në jetën e besimtarëve dhe qytetarëve të Tiranës.

Gjatë qëndrimit dyditor në vendin tonë z. Çiçek është takuar me homologen e tij znj. Jozefina Topalli, Presidentin Bamir Topi dhe Kryeministrin Sali Berisha.

Në vizitën e tij në xhaminë e Et’hem Beut z. Çiçek shoqërohej nga deputetë të parlamentit turk si dhe nga ambasadori i Republikës së Turqisë në Tiranë, Hasan Sevilir Ashan.

Në fund, Myftiu Gurra pasi e falënderoi politikanin turk për vizitën dhe fjalët e ngrohta, i dhuroi atij si kujtim nga Shqipëria një panoramë të xhamisë së Et’hem Beut.

Themelet e xhamisë së Et’hem Beut, i vuri Molla Beu në fund të shekullit të 18-të, kurse faltoren e plotësoi i biri, Haxhi Et’hem Beu në çerekun e parë të shekullit të 19-të. Për vlerat e saj artistike, ajo u shpall pas Luftës së Dytë Botërore monument kulture. Si rrjedhim nuk u rrënua gjatë luftës që iu bë monumenteve fetare në vitet ‘60-të të shekullit të 20-të.

/Drita Islame/