Greqia tërheq konsullin nga Korça

Ditën e sotme Ministria e Jashtme greke ka shkarkuar nga detyra konsullin grek në Korçë Theodhorus Ikonomus. Lajmi bëhet i ditur nga Konsullata e Greqisë, e cila deklaron se Ikonomus është thirrur në Athinë nga Ministria e Jashtme. Vendimi për largimin nga detyra ka ardhur pas thirrjeve që bëri Ikonomus për ndryshimin e kombësisë dhe quajtjen e zonës së Korçës si Vorio Epir. Vendimi ka ardhur pas kontakteve që ministri i Jashtëm Haxhinasto ka pasur me ambasadorin grek në Tiranë. Ndërkohë nga Partia Demokratike, Gazmend Oketa ka kërkuar shpalljen non-grata të konsullit. Sipas shtypit në Greqi, Ministria e Jashtme ka tërhequr Konsullin e Përgjithshëm grek në Korçë. Largimi nga detyra bëhet disa muaj para përfundimit të mandatit të tij në krye të konsullatës greke në Korçë. Ikonomus, në 20 vjetorin e themelimit të Omonias në Korçë ka lëshuar thirrje anit-shqiptare, ndërsa u ka kërkuar minoritarëve të mos i tremben procesit të regjistrimit të popullsisë. “Do të jap edhe njëherë të njëjtin mesazh: Po, ekzistojnë grekë në Korçë. Po, vllenjtë janë grekë. Grekë, mos u trembni nga regjistrimi i popullsisë, të shpallni origjinën reale dhe të gjithë atyre që janë në dyshim dhe me frikë dhe pyesin veten jam me siguri grek, ju them një gjë, shkoni në varreza dhe shikoni varrezat e etërve dhe gjyshërve tuaj dhe gjuhën në të cilën janë të shkruar dhe merrni vendimin tuaj. Janë në gjuhën greke. Kjo betejë nuk mbaron me regjistrimin e popullatës, por nis me regjistrimin e popullatës greke”, ka thënë pak ditë më parë Ikonomus.