SLLOVENI, ERDOAN VLERËSOHET ME ÇMIMIN "PERSONALITETI BOTËROR I DEKADËS SË FUNDIT"

Kryeministri i Turqisë, Rexhep Tajip Erdoan dje në Slloveni u vlerësua me çmimin "Personaliteti Botëror i Dekadës së Fundit".

Instituti Ndërkombëtar i Studimeve për Lindjen e Mesme dhe Ballkanin me seli në Lubljanë e zgjodhi Kryeministrin Erdoan "Personaliteti Botëror i Dekadës së Fundit".

Vendimin për të dhënë këtë çmim instituti slloven e mori me arsyetimin se z. Erdoan viteve të fundit është bërë një lider i njohur botërisht dhe që ndjekë politika pozitive në rajon.

Çmimin e lartpërmendur shefi i qeverisë turke e mori nga duart e presidentit honorar të institutit dhe ish-kryetarit të shtetit të Kroacisë, Stjepan Mesiç.

Ish-presidenti kroat tërhoqi vëmendjen se z. Erdoan e ka kthyer Turqinë në një aktore të rëndësishme të rajonit dhe më gjerë.

Ndërsa Kryeministri Erdoan u shpreh se çmimi, që ai mori nga Instituti Ndërkombëtar i Studimeve për Lindjen e Mesme dhe Ballkanin, do të konsolidojë urat lidhëse ndërmjet Sllovenisë dhe Turqisë.

Ai kritikoi politikat raciste, që gjatë viteve të fundit kanë shënuar një rritje të konsiderueshme në Evropë, dhe theksoi se nga këto politika ndikohet edhe procesi i anëtarësimit të Turqisë në Bashkimin Evropian.

"Si rezultat i qasjeve raciste, diskriminuese dhe populiste të disa vendeve në Bashkimin Evropian, jo vetëm që u ngadalësua procesi i anëtarësimit të Turqisë në BE, por filluan të vihen në dyshim edhe vlerat evropiane. Ngjarja në Norvegji është shumë përtej një çështjeje gjyqësore të zakonshme. Të tilla janë edhe rastet e herëpashershme në Gjermani. Kurse qëndrimet, që u mbajtën në Francë përpara zgjedhjeve presidenciale, janë shndërruar në një lidership të papërgjegjshëm dhe jovizionar, që për fat të keq gërryen dhe shkakton erozion në vlerat evropiane", tha ndër të tjera Kryeministri i Turqisë, Rexhep Tajip Erdoan./trt/