Revista “Ala” për femrat e mbuluara, thyen rekord shitjesh

“Ala”, e para revistë mode për femrat myslimane, ka regjistruar një rekord shitjesh duke lënë pas vetes shumë prej revistave të njohura të modës në Turqi.

“Ala” vazhdon të fitojë terren në tregun e revistave të modës. Burimet mediatike turke bëjnë të ditur se revista e cila u dedikohet kryesisht myslimaneve të mbuluara, kohët e fundit ka pësuar një tërheqje në masë të gjerë, duke fituar terren ndaj revistave të tjera të modës në vend.

Botimi i revistës filloi në qershor të vitit 2011, dhe pas më pak se një vit, zuri vendin e katërt, sipas tirazhit të shitjes, duke u renditur pas revistave si “Cosmopolitan”, “Vogue” dhe “Elle”, me 20.000 kopje të shitura dhe duke kaluar dhe Marie Claire, me 18.600 kopje, bën të ditur AFP.

“Ala”, që në turqisht do të thotë e “bukur”, merret me temat e modës, bukurisë dhe këshilla për karrierë. Më shumë se gjysma e grave turke mbajnë shami. Ju mund të mbani shaminë dhe të vazhdon të jeni pjesë e jetës aktive në shoqëri, është mesazhi kryesor që përcjell kjo revistë nëpërmjet faqeve të saj.

“Sot, gratë e para të Turqisë mbajnë shaminë. Gratë me shami mund të shihen kudo. Jemi bërë pjesë e pranueshme e shoqërisë. Me anë të revistës sonë ne duam t’u tregojmë këtyre grave (myslimane) se ato mund të kërkojnë shumë më tepër nga jeta, të duken më të stilizuara dhe të jetojnë një jetë më emocionuese, e që shamia të mos jetë pengesë”, – thotë kryeredaktorja e modës në revistën “Ala”, Esra Sezis për Deutsche Welle.