Mirësjellja e gruas ndaj burrit

Mirësjellja e gruas ndaj burrit

Allahu Subhanehu we Te‘Ala thotë:

„O ju që besuat, kinie frikë All-llahun me sinqeritet të vërtetë dhe mos vdisni, pos vetëm duke qenë muslimanë (besimtarë)!“ (Ali Imran, 102)

„O ju njerëz! Kinie frikë Zotin tuaj që ju ka krijuar prej një veteje (njeriu) dhe nga ajo krijoi palën (shoqën) e saj, e prej atyre dyve u shtuan shum burra e gra. Dhe kinie frikë All-llahun...“ (En-Nisa, 1)

„O ju besimtarë, pëmbajuni mësimeve të All-llahut dhe thuani fjalë të drejta. Ai (All-llahu) iu mundëson të bëni vepra të mira, ju shlyen juve mëkatet tuaja, e kush respekton All-llahun dhe të Dërguarin e Tij, ai ka arritur një sukses të madh.“ (El-Ahzab, 70-71)

Allahu subhanehu we Te‘Ala e ka caktuar martesën mes njerëzve për disa arsye dhe dobi të rëndësishme për individin dhe gjithashtu për shoqërinë.

Prej këtyre dobive janë:

1. Bindshmëria ndaj Allahut subhanehu we Te‘Ala, ngase Allahu subhanehu we Te‘Ala thotë:
„martohuni me ato gra që ju pëlqejnë“ (En-Nisa, 3)

2. Ruajtja e racës njerëzore në mënyrë që të banojnë në tokë dhe ta adhurojnë Allahun subhanehu we Te‘Ala.

3. Ruajtja e nderit, ulja e shikimit dhe shfryerja e epshit në mënyrë të lejuar.

4. Ruajtja e rrënjeve (të farefisit).

5. Qetësia shpirtërore.

6. Shtimi dhe rritja e Ummetit të Muhammedit salAllahu alejhi we selem.

7. Ruajtja e shoqërise nga sëmundjet morale dhe seksuale.

Mirëpo me kalimin e kohës, për shkak të kontaktit mes shteteve të ndryshme dhe ndikimit nga shtetet jobesimtare në shtetet muslimane dhe gjithashtu për shkak ideve dhe filmave shkatërrues dhe degjenerues kanë filluar të shfaqen problemet dhe janë përhapur sikurse zjarri deri në atë pikë që sot 50% të rasteve në gjyq janë për shkak problemeve martesore.

Pejgamberi salAllahu alejhi we selem e ka pyetur njërën nga gratë e sahabëve: „A je e martuar?“ Ajo tha: „Po.“ Ai salAllahu alejhi we selem e pyeti: “Si po sillesh me burrin tënd?” I tha: "E dëgjoj dhe i respektoj kërkesat e tij, përveç nëse diçka nuk kam mundësi ta bëj." Pejgamberi (salallahu alejhi ue selem) tha: “Sigurohu të jesh e dëgjushme ndaj tij, sepse ai është Xhenneti yt dhe ai është Xhehennemi yt (Me të mund ta fitosh Xhennetin, nëse e dëgjon, dhe mund ta fitosh Xhehennemin, nëse e kundërshton)” (Et-Tirmidhiu, dhe zingjiri i transmetuesve eshte sahih).

Megjithatë disa burra i trajtojnë gratë e tyre sikur të ishin robëresha të ndonjë tirani shtypës. Këta burra përdorin metoda të ndryshme për t‘i abuzuar dhe torturuar gratë e tyre, madje edhe i rrahin ato. Pejgamberi salAllahu alejhi we selem ka thënë: „Më i miri prej jush është ai që sillet më së miri me gruan e tij dhe unë jam më i miri me gruan time.“(Et-Tirmidhiu dhe Ibn Maxhe).

Lus Allahun subhanehu We Te‘ala të na udhëzojë në rrugën e drejtë dhe të na dhurojë lumturi në këtë jetë dhe në jetën tjetër.

O Zoti ynë! Na dhuro ne nga gratë tona dhe pasardhesit tanë ate që është e këndshme për sytë tanë dhe na bëj prej udhëheqësve të njerëzve të drejtë e të devotshëm.

Zoti im! Më fal mua, prindërit e mi dhe secilin që hyn në shtepinë time si besimtarë dhe fali të gjithë burrat dhe gratë besimtare.

Dhe zullumqareve mos i shto tjetër pos shkatërrimin.

Dhe lutja jonë e fundit është: Falenderimet i takojnë Allahut, Zotit të Botërave.

Vazhdon inshaAllah...

Marrë nga libri: Si ta përfitosh zemrën e burrit tënd

Përktheu: Ebu MUSLIM