KMSH merr pjesë në Komisionin Parlamentar të Ligjeve për Arsimin

Komunitetet fetare në Shqipëri, myslimanët, katolikët, ortodoksët dhe protestantët, janë thirrur sot në një seancë dëgjimore në Komisionin Kuvendor të Arsimit e Medias, ku kanë dhënë opinionet e tyre në lidhje me projektligjin e arsimit parauniversitar. Nga Komuniteti Mysliman mori pjesë nënkryetari i KMSH-së z. Bujar Spahiu.

Z. Spahiu në këtë takim ka folur për sistemin arsimor të Komunitetit Mysliman, duke i bërë një pasqyrë shkollave të KMSH-së, medreseve dhe Universitetit, të cilat ecin në rrugën e suksesit, me plane dhe kurrikula të miratuara nga Ministria e Arsimit dhe e Shkencës, ku lëndët shkencore janë gërshetuar me ato fetare. Ai ka theksuar se tashmë kur Shqipëria aspiron për në BE, duke marrë shembull edhe shumë vende evropiane, nuk duhet të dëgjohen më, probleme për ndalimin joligjor të disa vajzave me shami në shkollat publike të vendit tonë, si dhe në të ardhmen duhet të futet një lëndë me zgjedhje, për njohuri të përgjithshme fetare, ku brezat e rinj të informohen për fetë e bashkëqytetarëve të vet në vendin tonë.

Përfaqësuesit e besimeve fetare kanë kërkuar njëzëri lejimin e identitetit fetar, sidomos kur ai shfaqet për arsye obligative të besimit, siç është edhe shamia, si dhe futjen e një lënde për njohuritë fetare në shkollat publike.

Ky takim vjen pas një komunikimi të gjatë midis KMSH-së dhe Ministrisë së Arsimit, pas debateve të hapura edhe në media, në lidhje me arsimin parauniversitar, që nga koha kur drafti i projektligjit filloi të shqyrtohej nga grupet e ndryshme të interesit.

Në një takim që është zhvilluar para një viti kur edhe filloi të diskutohej ky ligj, Ministri Tafaj e ka garantuar Kryetarin e KMSH-së H. Selim Muça, se nuk të ndërmerret asnjë nismë zyrtare për miratimin e projektligjit në fjalë pa u marrë në konsideratë sugjerimet e grupeve të interesit.

Projektligjin e kanë kundërshtuar shumë organizata joqeveritare, por reagimi i parë zyrtar ndaj këtij projektligji ka ardhur nga Komuniteti Mysliman i Shqipërisë, që më datë 27 dhjetor 2010 dhe po ashtu diskutimi i parë publik me një grup interesi ka qenë ai mes KMSH-së dhe MASH, zhvilluar me dt. 11.01.2011.

Në mënyrë sistematike KMSH ka kërkuar lejimin në shkolla të vajzave, që mbajnë shami, si një e drejtë e çdokujt, që të mbajë veshjen sipas besimit që predikon.

/Drita Islame/