Erdoan takohet me kinezët turqishtfolës

nga **Albani** Tue Apr 10, 2012 5:23 pm

Për herë të parë pas 27 vjetëve një kryeministër turk mbërriti dje në një vizitë zyrtare në Pekin, një udhëtim që Rexhep Tajip Erdoan e ka filluar në rajonin autonom mysliman të Sinxhanit, ku jetojnë ujgurët turqishtfolës.

Para mbërritjes në Pekin, ku ai u prit nga homologu Ven Xhiabao, Erdoan ndaloi në Urumçi, kryeqyteti i Sinxhanit, territor i madh i goditur nga tensione të forta mes Hansëve (etni maxhoritare në Kinë) dhe ujgurëve.

"Ishte shumë e pritshme që kinezët mos t'i lejonin turqit të shkonin në Sinxhan", komentoi profesori Zhan-Pier Kabestan, ekspert i Kinës në universitetin e quajtur “Hong Kong”.

"Por, marrëdhëniet me Turqinë janë shumë të mira që prej tre-katër vjetësh'', shtoi ai.

"Kinezët kanë nevojë për Turqinë. Në Lindjen e Mesme ata kanë nevojë për një mbështetje. Ata e mirëpresin faktin që Turqia është një vend që po ngjitet, po zhvillohet, qëndron në portën e Bashkimit Evropian, por ka një rol të veçantë si në Lindjen e Mesme dhe në Evropë'', nënvizoi Zhan-Pier Kabestan.

Gjatë vizitës zyrtare në Pekin, Rexhep Tajip Erdoan do të pritet nga Presidenti kinez, Hu Xhintao dhe Zëvendëspresidenti, Shi Xhinping.

Diskutimet do të përqendrohen veçanërisht në çështjen e programit bërthamor iranian, ndërkohë që negociatat për këtë çështje do të rifillojnë të shtunën në Stamboll duke mbledhur rreth tryezës Iranin dhe fuqitë e mëdha të grupit 5+1, ku bën pjesë dhe Kina