Mblidhen imamët e Myftinisë Shkodër

Ditën e enjte, më 10 shkurt 2011, në ambientet e xhamisë së Parrucës është zhvilluar mbledhja e imamëve të Myftinisë Shkodër. Në rend të ditës ka qenë puna dhe aktiviteti i Myftinisë, xhamive dhe imamëve përkatës. Gjatë saj, Myftiu Imam Muhamed Sytari ka kërkuar nga imamët angazhim maksimal për të prezantuar sa më mirë mesazhin e fesë islame dhe mëshirën me të cilën u dërgua hz. Muhammedi (a.s).
Në këtë mbledhje, është folur edhe për përgatitjet për zhvillimin e aktiviteteve me rastin e përkujtimit të lindjes së hz. Muhammedit (a.s). Rreth kësaj pike, Myftiu ka kërkuar që hytbeja e ditës së nesërme, më 11 shkurt 2011 të përqendrohet te kjo temë. Njëkohësiht ai ka theksuar se është detyrë e secilit prej nesh, të shfrytëzojë këtë ngjarje për të përcjellur te krejt besimtarët përreth, tre mesëazhe thellësisht të rëndësishme, që lidhen me shfaqjen mëshirë të hz. Muhammedit (a.s). “Disa, në perëndim, prej atyre që flasin përçart, thonë se Muhammedi nuk solli asgjë të re. Ata thonë se feja e tij është përhapur me shpatë. Ata thonë se feja e Muhammedit nuk i flet mendjes. E kemi për obligim në hak të pejgamberit tonë t’i qartësojmë njerëzve të vërtetën rreth këtyre trillimeve mesjetare!”

Myftiu ka kërkuar nga imamët të jenë të vëmendshëm ndaj disa misionarëve që po përhapen lagje më lagje dhe fshat më fshat, sidomos në zonën e Postribës, me qëllim konvertimin e muslimanëve dhe “blerjen” e tyre duke shfrytëzuar varfërinë dhe mjerimin që ekziston në fshat. Me këtë rast ai ka kërkuar edhe vëmendjen e imamëve në lidhje me xhaminë e kalasë së Drishtit.

Më pas, ai ka dëgjuar disa nga mendimet dhe sugjerimet e imamëve në lidhje me temat e trajtuara në këtë mbledhje.

Në këtë mbledhje të imamëve të Myftinisë Shkodër, ka marrë pjesë edhe Myftiu i Pukës, Imam Gëzim Kopani, i cili ka mbajtur edhe një fjalë përshëndetëse në fund të saj, ku ka uruar imamët për punën e tyre dhe angazhimin serioz në shërbim të fesë dhe moralit të saj.

Nga: http://myftiniapuke.webs.com/apps/forums/topics/show/4258221-mblidhen-imam-e-myftinis-hkod