E bukura e dheut në Turqi

Një biznesmen turk ka nxjerrë në treg një revistë mode krejt të veçantë, pasi është vetëm për femrat që mbajnë hixhab. Ai ka thënë se ndjen bezdi nga përhapja në masë e fotove nudo të femrave, në revista të ndryshme në mbarë botën. Pronari i revistës në fjalë, e cila mban emrin “Ala” synon të vërtetojë suksesin edhe të revistave që nuk përmbajnë foto femrash me bikini.Ibrahim Porak, 31 vjeç dhe miku i tij Mehmet Falkan, 32 vjeç, janë personat që i dhanë jetë revistës “Ala” e cila është etiketuar si fronti mediatik i modës së femrave me hixhab.

Fjala “Ala” në turqisht do të thotë e bukura e dheut dhe në të publikohen foto dhe imazhe vetëm të modeleve të mbuluara me hixhab, për të reklamuar veshjet që përkojnë me normat islame.

Gjatë një interviste për gazeten gjermane Spiegel, pronari i revistës ka thënë:”Revistat e famshme botërore, fokusohen tek fotot e femrave nudo. Sakaq, ne, bashkë me milona femra nga mbarë bota, besojmë se moda mund të jetë dhe diçka krejt e ndryshme nga ajo që jemi mësuar të shohim.”

Edhe pse deri tani kanë dalë vetëm gjashtë numra të revistës, ajo konsiderohet si tepër e suksesshme, pasi janë shitur 30 mijë kopje, me pesë mijë abonentë të rregullt. Vetëm nga Gjermania revista ka 1.500 abonentë dhe pritet që për shkak të kërkesës së lartë, revista të botohet dhe në gjermanisht.

Pronari i revistës ka thënë se ajo nuk u drejtohet vetëm femrave të mbuluara me hixhab. Sipas tij, revista ka për qëllim të luftojë lakuriqësinë, gjë e cila u intereson të gjitha grave.