Londër, protestë masive në përkujtim të viktimave të Gazës

Me mijëra protestues janë grumbulluar përballë ambasadës izraelite në Londër në përkujtim të luftës së 2008 në Rripin e Gazës, ku mbetën mbi 1450 të vrarë dhe mbi 5000 të plagosur, mes të cilëve gra dhe fëmijë të pafajshëm.
Mes protestuesve ishin anëtarë të parlamentit britanik dhe një numër përfaqësuesish të institucioneve dhe subjekteve politike, përfaqësues të lëvizjeve të grave e studentore, etj.

Sipas burimeve të medies, protestuesit mbanin në duar pankarta me mbishkrime ku dënohej sulmi izraelit ndaj Rripit të Gazës, si dhe bllokada ekonomike që po i merr frymën popullatës atje që prej pesë vitesh.

Situata aktuale në Gaza paraqitet e rëndë. Banorët janë të shqetësuar për jetën dhe fatin e fëmijëve të tyre, të cilët përveç pasigurisë duhet të përballen edhe me kushtet e rënda ekonomike.

Vetëm një ditë më parë avionë izraelitë kanë bombarduar me raketa një makinë civile në Rripin e Gazës, duke lënë një të vdekur dhe disa kalimtarë të plagosur. /Drita Islame/