Premierliga, kalojnë Junajtid e Arsenali, ndalet Siti

Java e 24-t e Premierligës: tripletat e Berbatovit dhe Van Persit i japin fitoret e radhës Mançester Junajtid dhe Arsenalit. Siti humbet me Aston Vilën, Njukasëlli ndal Totenhemin (1-1), “ngallet” Liverpuli. Nesër Çelsi.
Dimitar Berbatov ishte protagonisti i madh i suksesit spektakolar 5-0 të “Djajve të kuq” përballë Birminghemit. Në “Old Traford”, sulmuesi bullgar realizoi tripletë, duke vijuar të kryesojë listën e golashënuesve të kampionatit anglez me 17 të tillë. Gigs dhe Nani autorët e dy golave të tjerë. Ky sukses e ngjit skuadrën e Fergusonit të vetme në krye, me dy pikë më tepër se Arsenali.

“Topçinjtë” e Arsen Vengerit kaluan pa problem (3-0) pengesën Uigan, falë tri golave të të rikthyerit Robin van Persi. Holandezi ka luksin që në fund të gabojë edhe një penallti, ndërkohë që Ualkot e Fabregas humbën raste të pastra për të thelluar fitoren. Me një ndeshje më tepër dhe dy pikë pas, Arsenali ka edhe golaverazh më të dobët se Junajtid: +26 kundrejt +29.

Mançester Siti “rrëzohet” 1-0 në fushën e Aston Vilës, duke mos mbajtur dot hapin e kryesuesve. Vendasit nga “Vila Park” sigurojnë tri pikë të arta në synimin për të mbetur mes më të mirëve sezonin e ardhshëm, e njëkohësisht i gëzohen blerjes më të re, Darren Bent, autor i golit të fitores. Kurse Siti mbetet tri pikë pas “kushërinjve” të Junajtid, të cilët kanë luajtur dy ndeshje më pak.

Nga grupi i ekipeve pretendente për titull, Totenhemi arriti të shmangë humbjen në fushën e Njukasëllit. Golit të Koloçinit në minutën e 59-të për vendasit, skuadra londineze iu përgjigj me Lenonin pak para fishkëllimës përfundimtare. Liverpuli gjen fitoren e parë nën drejtimin e trajnerit Keni Dalglish (3-0 në fushën e Volverhemptonit), falë dygolëshit të Torresit dhe Raul Meierelesit.

Evertoni barazoi 2-2 në shtëpi ndaj Uest Hemit, Sandërlendi mundi në transfertë Blekpulin 2-1, kurse Fulhami kaloi me sukses, 2-0 Stoken. Të dielën (ora 17:00) Blekbërni pret Uest Bromuiçin, ndërkohë që java e 24-t e kampionatit anglez mbyllet me sfidën Bolton-Çelsi, të hënën mbrëma, ora 21:00.


Premierliga, java e 24-t:

Të shtunën
Volverhempton 0 - 3 Liverpul
Arsenal 3 - 0 Uigan
Blekpul 1 - 2 Sandërlend
Everton 2 - 2 Uest Hem
Fulham 2 - 0 Stoke
Mançester Junajtid 5 - 0 Birminghem
Njukasëll 1 - 1 Totenhem
Aston Vila 1 - 0 Mançester Siti

Të dielën
Blekbërn - Uest Bromuiç (17:00)

Të hënën
Bolton - Çelsi (21:00)