Skandali, flamuri kombëtar “kokë poshtë” në Qemal Stafa

Mbrëmjen e sotme në rrjetin social Facebook është përhapur një foto e flamurit kombëtar shqiptar, i vendosur në ambjentet e stadiumit “Qemal Stafa” me rastin e ndeshjes së nesërme Shqipëri-Francë, e vlefshme për Euro 2012. Ajo që ka ngjallur reagimin e shumë përdoruesve të faqes “Jeta është qejf”, aty ku edhe ne kemi shkëputur këtë foto është fakti se flamuri shqiptar është vendosur mbrapsht. Edhe pse përgjegjës për vendosjen e dekorimit janë punonjësit e stadiumit, Federata Shqiptare e Futbollit duhet t’i kontrollonte këto detaje, pasi vetë FSHF i shpërndan këto materiale, pas prenotimit të fushës. Përdorues të kësaj faqe e kanë ironizuar këtë fakt me komente të tilla si: “Mirë që nuk kanë vënë flamurin me yll të komunizmit si në KE”, apo “Injoranca ka arritur majat më të larta”. Ne të BalkanWeb shpresojmë që deri nesër flamuri dhe shqiponja të jenë kthyer me kokën lart! (m.a/BalkanWeb)