TIRANË - FILMI “THE TREE OF LIFE” NGJALL DEBATE NË SHQIPËRI

Filmi me protagonistë Brad Pitt, Sean Penn, Jessica Chastain, ka ngjallur mjaft debate në vend mes atyre që e kanë pëlqyer dhe atyre që jo dhe sa herë që shfaqet filmi ndodh të ketë shikues që braktisin sallën e kinemasë.
Që prej datës 19 gusht në kinema “Millennium” në Tiranë po shfaqet filmi fitues i Palmës së Artë në Festivalin e Kanës “Pema e jetës”, një dramë filozofike që vë përballë dy botë, jetën e makrokozmosit, universit dhe atë të mikrokozmosit, familjes.

Filmi me protagonistë Brad Pitt, Sean Penn, Jessica Chastain, ka ngjallur mjaft debate në vend mes atyre që e kanë pëlqyer dhe atyre që jo dhe sa herë që shfaqet filmi ndodh të ketë shikues që braktisin sallën e kinemasë.

Sipas burimeve nga kinema “Millennium”, ata të cilët largohen dhe e lënë filmin në mes janë kryesisht të rinj pasi filmi është relativisht i vështirë për t’u kuptuar. Ndërkohë që një arsye tjetër është edhe kohëzgjatja e filmit për më shumë se dy orë.

Po sipas të njëjta burimeve, artistë të shumtë që kanë parë filmin apo një publik më i kualifikuar kanë dalë të kënaqur nga salla e kinemasë dhe me vlerësime për filmin. Të shumtë janë ata të cilët e kanë cilësuar si një film të mërzitshëm për shkak të mungesës së tekstit, por të tjerë e kanë vlerësuar si një film me fotografi dhe muzikë të veçantë.

Filmi me regji dhe skenar të Terrence Malick rrëfen historinë e një familjeje që në vitet ‘50 rrit tre djem mes dashurisë dhe autoritetit të prindërve. Më i madhi prej tyre ndryshon mendimin për botën pasi provon vuajtjen, por shumë shpejt arrin të kuptojë shkakun e ekzistencës.

Xheku 11-vjecar rritet mes një babai autoritar dhe kërkues e një nëne të ëmbël e mbrojtëse. Ne fillimet e tij ai bën një jetë të mrekullueshme duke u rritur mes dy mënyra dashurish të forta dhe të ndryshme, të ndara mes tyre për të gjithë jetën. Imazhi i lumturisë zbehet kur shfaqet sëmundja dhe vuajtjet e vdekjes. Bota që dikur ishte një gjë e bukur, shndërrohet në një labirint, ndërkohë që historia mbyllet me shpresën për të rinjohur bukurinë dhe gëzimin kudo në jetën e përditshme dhe sidomos tek familja.

Reagimet me largimin e filmit nga salla e kinemasë janë të njohura për këtë film edhe gjatë shfaqjes së tij në disa kinema botërore si pasojë e një filmi të vështirë për t’u kuptuar nga masa dhe që kërkon një sy profesional.

Filmi është konsideruar disi autobiografik nga kritika, por aktori Brad Pitt mendon se më shumti ky është një film universal, që flet për të vegjël e të mëdhenj. Këmbënguljes së medias për të gjetur gjurmë të jetës së tij personale në rol ai i përgjigjet: “Ka disa gjëra nga personazhi im që më përkasin, si fjala vjen dashuria për natyrën, kujtimi i ëmbël dhe i dashur i nënës, apo ëndrra amerikane e mishëruar në figurën e babait, por nuk mendoj se një film kaq universal ka të bëjë vetëm me përvojën e një individi”.

“The tree of life” do të vazhdojë të shfaqet në kinema deri në 26 gusht.

3 ore film more