Nga 1 korriku, paga minimale 20 mijë lekë

Këshilli Kombëtar i punës diskutoi të martën propozimin sipas të cilit paga minimale bazë në Shqipëri nuk do të jetë më pak se 20 mijë lekë të reja. Propozimi pritet t’i dërgohet qeverisë për miratim, shoqëruar edhe me kërkesën e grupeve të interesit për shmangien e efekteve prapavepruese të vendimit, i cili nis nga 1 korriku i këtij viti.
“Paga prej 20 mijë lekësh në muaj plotëson ata standarte që kërkohen për një të punësuar, së dyti, në këtë pagë minimale, nuk dëmtohet konkurrueshmëria e biznesve, veçanërisht ato biznese që kanë shumë fuqi punëtore në strukturat e tyre dhe ndikimi i buxhetit të shtetit është i përballueshëm”, tha Astrit Uka, drejtor i pagave në ministrinë e Punës.
Ndërkohë, përfaqësues të industrisë së modës i kërkuan ministrisë së Financave të rishikojë edhe një herë vendimin për heqjen e taksave doganore, i cili sipas tyre prek vetëm prodhuesit fasonist të konfeksioneve, ndërsa lë jashtë skemës përfituese prodhuesit e këpucëve në vend, të cilët zënë 60% të eksporteve të këtij sektori.
“Importet 4 sot mbulojnë 100 mijë euro, çfarë i kushton qeverisë shqiptare 100 mijë euro në vit për të hequr taksën zero për këtë sektor. Nëqoftëse sektori i konfeksioneve ishte 471 milionë, sektori i këpucëve është 14 milionë. Çfarë e pengon qeverinë që të fusë edhe këtë sektor për të ecur përpara”, tha Përfaqësuesja e Industrisë Fasone, Donika Mici, raportoi BW.
Ndërsa zv/ministri i Financave, Alfred Rushaj, tha se vendimi për heqjen e taksës doganore nuk diskriminon prodhimin e këpucëve në vend, nisur kjo edhe nga vlera monetare që zë kjo taksë.
“Bërja zero e taksës doganore për lëndë të para për këpucët, për lëndë të para për konfeksionet nuk e vë industrinë e këpucëve në një pozitë diskriminuese për sa i përket konkurencës me pjesën tjetër të industrisë, sepse produktet që ju shisni janë të niveleve të ndryshme”, tha zoti Rushaj.