Regjistrimi etniko-fetar, komisioni i Ligjeve fillon sot shqyrtimin

TIRANE- Komisioni parlamentar i ligjeve do të fillojë sot shqyrtimin e projektligjit “Për regjistrimin e përgjithshëm të popullsisë dhe banesave’, të ndryshuar”. Në datën 27 qershor, Kuvendi miratoi me votat e maxhorancës në mungesë të deputetëve të opozitës, kërkesën e qeverisë për të kaluar me procedurë të përshpejtuar projektligjin për regjistrimin e popullsisë.

Me gjithë kundërshtitë e bëra publike në seancë nga deputeti i PDIU-së, Dashamir Tahiri, por edhe protestën para godinës së Kuvendit të Aleancës Kuq e Zi, 71 deputetë në Kuvend i hapën rrugën diskutimit nëpër komisione për projektin e ashtuquajtur “Pollo”. Pritet që projektligji për regjistrimin e popullsisë mbi baza etnike dhe fetare të rikthehet në Kuvend për t’u miratuar nen për nen në seancën e ardhshme të parlamentit.

Pas përfundimit të seancës parlamentare, ministri i Inovacionit, Genc Pollo,nismëtar për të kaluar pr/ligjin me procedurë të përshpejtuar në parlament, shpjegoi se nuk bëhet fjalë për pr/ligjin për regjistrimin e popullsisë mbi baza etnike dhe fetare, i cili mendohet të shkojë në parlament në vjeshtë. Sipas tij, bëhet fjalë për një projektligj, i cili parashikon regjistrimin e të dhënave për efekte statistikore, i cili do të kryhet nga Instituti i Statistikave.
(m.a/GSH/BalkanWeb)