Brazil, zbulohet fisi indigjen i panjohur më parë

RIO DE JANEIRO- Qeveria braziliane ka konfirmuar këtë javë se ka zbuluar ekzistencën e një tribuje indigjenësh të panjohur deri më sot në jugperëndim të pyjeve masive të Amazonës.

Zyrtarët brazilianë bëjnë të ditur se kanë mundur të lokalizojnë dhe të fotografojnë nga ajri me satelit banorë të një fisi indigjen të panjohur deri më sot.
Ky fis banon në një kënd të largët të pyllit të Amazonës, në afërsi të kufirit me Perunë. Fisi tërësisht i izoluar, pa kontakt me popullsinë tjetër braziliane, u zbulua në rezervat e “Vale do Javari”.
Lajmi u bë i ditur nga Funai, agjencia shtëtërore për mbrojtjen e indianëve, sipas të cilës, bëhet fjalë për rreth 200 njerëz, që besohet se i përkasin familjes gjuhësore Pano, me origjinë nga Peruja. Sipas shërbimit Funai, kjo gjuhë është karakteristike për njerëzit që jetojnë në kufirin e Brazilit me Perunë dhe Bolivinë.
Ky fis mund të jetë një grup që është detyruar të arratiset nga sharrat abuzive, nga presioni i kërkuesve klandestinë të arit ose nga kërkuesit e naftës, shkruajnë mediat.

Fotografitë e publikuara nga agjensia shtetërore për cështjet indigjene, Funai, shfaq kasollë të mëdha prej kashte, të rrethuara me mjaft gjelbërim, ku dallohen bime si kikirikë, drithëra dhe banane, të cilat besohet se janë dhe ushqimet e tyre të përditshme.

Përfaqësuesi i shërbimit brazilian Funai, që është përgjegjëse për të drejtat e komuniteteve autoktone, Fabricio Amorim tregoi se në regjistrimet satelitore kanë zbuluar tri rrafshe të vogla të banuara.

Qeveria braziliane përpiqet t`i shmanget kontaktit të drejtpërdrejt me komunitetet fisnore, duke u përpjekur njëkohësisht që të ruajë tokën e tyre nga shfrytëzimi për nevoja industriale. Por, shumë ekspertë mendojnë se përfaqësuesit qeveritarë do të duhej të bien në kontakt me këta banorë autoktonë, nëse duan t`i mbrojnë nga kërcënimet e jashtme.
Në Brazil jetojnë rreth 68 fise indiane të izoluara. Qeveria e Brazilit krijoi kontaktin me njërin nga përfaqësuesit e komunitetit autokton, por për arsye të sëmundjeve që sollën me vete punonjësit e shtetit, asokohe pati një përqindje të madhe vdekshmërie në fiset autoktone.
Që nga ajo kohë, qeveria braziliane mbron rreth 14 milionë hektarë të xhunglës së Amazonës, ku jetojnë ato fise.

(d.b/AP/BalkanWeb)